ކަނބުލޮ(8)

ތުނޑިޔާ އަރާ ހަމަވުމާއެކީ ހުރިހާ އެންމެންނަށް އެއްފަހަރާ ހުއްޓެވިއްޖެއެވެ. އެމީހުންނަށް ފެނުނީ ގަބޫލުކުރަން ދަތި މަންޒަރެކެވެ. ތުނޑިމަތީގައި ނަނު ހިފައިގެން މަސްބާނަން އެހުރީ އަސްލަމެވެ. އަސްލަމް ނާންނާނަމޭ ބުނެ މަޑުކުރީއެވެ. އެކަމަކު މިހާރު އެހުރީ ތުނޑިމަތީ މަސްބާނާށެވެ. އޭނާ އެތަނަށް އެހާ އަވަހަށް އައީ ކިހިނެއް ހެއްޔެވެ؟ އެންމެ އަވަހަށް އާދެވޭ މަގުން އަހަރެމެން މިއައީއެވެ. އެނޫން ގޮތަކަށް އެހާ އަވަހަށް ފަސޭހަކަމާއެކީ އެތާކަށް ނާދެވޭނެއެވެ. އެންމެންގެ ހިތުގައިވެސް މިކަހަލަ ތަފާތު ސުވާލުތަކާއި ހިޔާލުތަށް އުފެދެންފެށިއެވެ. ކޮންމެ ގޮތެއްވިޔަސް އެއީ އަސްލަމްކަމަށް ނިންމާފައި އެމީހުން އެދިމާއަށް ހިނގައިގަތެވެ. އެއާއެކީ އެހިސާބުގައި ގޮވަމުންދިޔަ ދޫނިތަކުގެ ގޮވުން ބާރުވެގެންދިޔައެވެ. ދޫނިތަކުގެ ގޮވުމާއެކީ ޒަމީރުގެ ހިނގުން މަޑުކޮށްލިއެވެ. ފަހަތް ފަހަތަށް ޖެހެން ފެށިއެވެ. އޭނާއަށް ކޮންމެވެސް އެއްޗެއް ވިސްނުނީ ކަންނޭގެއެވެ.

"އޭ! މަޑުކޮށްބަލަ. އޭނަޔާ ކައިރި ނުވާތި. މިކޮޅަށް އާދޭ." ޒަމީރު އެމީހުންނަށް ގޮވާ މަޑުކުރަން ބުންޏެވެ. " ހޫނ. އެއްކަލަ ޒަމީރުދޯ! ތީ ދެން ކޮން ކަމެއްތަ؟ އެއީ އަސްލަމޭ. ތިހާ ބިރުން އުޅޭކަށްނުވާނެ. އާދެބަލަ." މިހެން ބުނެފައި އެމީހުން އަނެއްކާވެސް ހިނގަންފެށިއެވެ. ނަމަވެސް ޒަމީރު އެހުރިގޮތަށް ހުއްޓެވެ.

"އޭތް! އޭތް! ޒަމީރު، ޝިފާން، ނިހާން، އަޒްމީ...." އެމީހުންނަށް ކުއްލި ހައިރާންކަމެއް ލިބުނީ ކޮންމެވެސް މީހަކު ގޮވަންފެށުމުންނެވެ. އެމީހުން އެއަޑާ ދޭތެރޭ ވިސްނާލިއެވެ. އަޑު އައީ އެއްގަމުންނެވެ. ހަމަ ޔަގީނުންވެސް އެއީ އަސްލަމްގެ އަޑެވެ. އެމީހުން އަޑުއައި ދިމާއަށް އެނބުރުނެވެ. އެއްގަމުގައިވެސް ހުރީ އަސްލަމެވެ. ތުނޑިމަތީ މަސްބާނަންވެސް ހުރީ އަސްލަމެވެ.

"ވާއު! މިވީ ކިހިނެއް؟ އަހަރެން ހިޔެއްނުކުރަން އަސްލަމްގެ ޓްވިންސެއް ހުންނަކަމަކަށް." ޝިފާނަށް އެކަންވީ މަޖަލަކަށެވެ. " އަދިވެސް ސަކަރާތް ޖަހަނީތަ؟ ނިކަން ސިރިޔަސްވެބަލަ. އަދިވެސް މި ވެގެން އުޅޭ ގޮތެއް ޝިފާނަކަށް ނޭގޭ ދޯ؟ ތުނޑިމަތީ އެހުރީ އިންސާނެއް ނޫން. އެއީ އަސްލަމްގެ ސިފަޔަށް ބަދަލުވެގެންހުރި ޖިންނިއެއް. އަހަރެމެންގެ ދުވަސް ދެން މިދިޔައީ. މިވަރު ވާއިރުވެސް ކަލޭމެން ތިބަލަނީ ސަކަރާތް ޖެހޭތޯދޯ!" ކަންތައް ވެގެން އުޅޭގޮތް ޒަމީރު އެމީހުންނަށް ކިޔައިދިނެވެ. " ދެން ކިހިނެއް ހަދާނީ؟" ވަރަށް ހާސްވެފައި ނިހާން ސުވާލު ކުރިއެވެ. "ދެންވެސް ހަދަންވީ ގޮތަކީ އެމީހަކަށް ކިޔުނު ހެޔޮއެއްޗެއް ކިޔަމުން އެއްގަމަށް އަރައިގެންގޮސް ގެއަށް ވަންނަންވީ. ނަމަ ނަމަ އެއްވެސް މީހަކު ފަހަތް ނުބަލާތި. ނުދުވާތި. އަޒްމީ، ތި އެންކޮތަޅު މިތާ ބަހައްޓާ!" އަޒްމީއަތުގައި އޮތް އެންކޮތަޅަށް އިޝާރާތްކުރަމުން ޒަމީރު ބުނެލިއެވެ. މިހެން ބުނުމުން އެންމެން މަޑު ހިނގުމެއްގައި ހިނގާފައި ގޮސް އެއްގަމަށް އަރައިފިއެވެ. އަސްލަމްވެސް އޭނާ ހުރިހިސާބަށް އެމީހުން އައުމާ އެކީ އެމީހުންނާ އެކީ ހިނގައިގަތެވެ.

އެމީހުންނަށް ގެއާހަމައަށް ދެވުނުއިރު އެއްބަޔަކު ބިރުންގޮސް ހަލާކުވަނީއެވެ. އަނެއްބަޔަކު ވަނީ ބިރުންގޮސް ހުންއަންނަވަރުވެފައެވެ. " މިހުރިހާކަމެއްވެސް މިވީ އަސްލަމާ ހެދި." ޝިފާން ރުޅިއައިސްގެން ހުރެ އަސްލަމާ ދިމާއަށް އެއްޗެހި ކިޔަން ފެށިއެވެ. " އަ..އަހަރެން ކީއްކުރީ؟" އަސްލަމް ހައިރާން ވެފައި ސުވާލު ކުރިއެވެ. " ކަލޭ އަހަރެމެންނާ އެކީ މަސްބާނަން ތުނޑިއަށް ނުދިޔައީމަ.އެނގިއްޖެތަ؟" ޝިފާން މިފަހަރު ވާހަކަ ދެއްކީ ކުރިއަށް ވުރެވެސް ރުޅިވެރިކަމާ އެކީއެވެ. އެއީ މީގެ ކުރިން ދުވަހަކުވެސް އަސްލަމާ ދިމާއަށް ޝިފާން ވާހަކަ ދެއްކި ގޮތެއްނޫނެވެ. އެހެންވެ އެކަމާ އަސްލަމް ވަރަށް ދެރަވިއެވެ. " އަދިވެސް ޒުވާބުތަ ކުރަނީ؟ ދެންވެސް ތިޔަ ޒުވާބުގަނޑު ހުއްޓާލާފަ އެންމެން އެއްބައިވެބަލަ. އޭރުން އަހަރެމެންނަށް މިކަމުން ސަލާމަތް ވެވެން އޮތީ." އަސްލަމާއި ޝިފާންގެ ޒުވާބު ފެނިފައި ޒަމީރު ވާހަކަ ދައްކަން ފެށިއެވެ. " އަހަރެން ނޫޅެން މިތާހުންނާކަށް. އަހަރެން މިދަނީ." މިހެން ބުނެފައި ޝިފާން އޭނާގެ ބިޓުގޮވައިގެން އެގެއިން ބޭރަށް ނިކުތުމަށް ހިނގައިގަތެވެ. ނުދާށޭ ބުނެ ބުނެ އޮށްވައެވެ. އެމީހުންގެ އަޑެއް ޝިފާން މެން ނޭހިއެވެ. އިތުރު މައްސަލައެއް ނިކުމެދާނެތީ ޝިފާންމެން ހިފާއްޓާކަށް އަދި އެމީހުންގެ ފަހަތުން ދާކަށް އެއްވެސް މީހަކަށް ނުކެރުނެވެ.

އޭގެ ގާތްގަނޑަކަށް 15 ވަރަކަށް މިނެޓް ފަހެވެ. މުޅިގޭތެރެއަށް ވަނީ ހަމަހިމޭންކަން ވެރިވެފައެވެ. ގޭތެރޭގެ އެކި ހިސާބުގައި އެކި މީހުން އިށިނދެގެން ތިއްބެވެ. އެއްވެސް މީހަކު ވާހަކައެއް ނުދައްކައެވެ. ހީވަނީ ދައްކާނެ ވާހަކަ ހުސްވީހެންނެވެ. ގޭތެރެއަށް ވެރިވެފައިވާ ހަމަހިމޭންކަން ފޫވައްޓާލީ ފުރާޅުމައްޗައް ކޮންމެވެސް އެއްޗެއް ވެއްޓުނުއަޑަށެވެ. އެއާއެކީ ސިއްސައިގެން ގޮސްފައި އެންމެން އެކަކު އަނެކަކުގެ މޫނަށް ބަލަން ފެށިއެވެ. "އެވާނީ ޝިފާންމެން ކަމަށް. އެމީހުން އެއުޅެނީ އަހަރެމެން ބިރުގަންނުވަން. ހުރެބަލަ މިފަހަރު ލަނޑެއްދޭނަން" މިހެން ކިޔާފައި އަޒްމީ ދޮރު ހުޅުވާފައި ބޭރަށް ނިކުތެވެ. މިމަންޒަރު ބަލަން ގޭތެރޭގައި ތިބި އެހެން މީހުން ތިއްބެވެ. އެމީހުންވެސް ހީކުރީ ހަމައަސްލުގައިވެސް ޝިފާންމެން ސަކަރާތް ޖަހަނީކަމަށެވެ. އެހެން ނަމަވެސް ކަންތައްވީ އެމީހުން ހީކުރިގޮތަކަށް ނޫނެވެ. އެއާ މުޅިން ހިލާފަށެވެ.
ލިޔުނީ: ޑީބީ
ކުރީގެ ބައިތައް: 1 2 3 4 5 6 7

ޕޯސްޓް ކުރީ dhi-burunu ތާރީޚް Saturday, April 10, 2010. މިލިޔުން ހިމެމެނޭނީ ވާހަކަ . ވިދާޅުވަމުން ތިޔަ ގެންދަވާ ލިޔުމަށް އިސްތިރާކު ކުރައްވާ! އާރު.އެސް.އެސް..