ކަނބުލޮ (5)

އަސްލަމާއި އޭނާގެ އެކުވެރިން މިއަޑު އިވުމާއި އެކީ ދުވެފައި ބޭރަށް ނިކުތެވެ. އެމީހުންނަށް މަގުމައްޗަށް ނިކުމެވުނީ ހަމަ ކިރިޔާއެވެ. އޭރު އެހިސާބަށް ރާޅު އަރާ ހަމަވަނީއެވެ. އެއާއެކުއެކީ އެމީހުންވެސް ރާޅާއި އެކީ ދަމައިގަނެފިއެވެ. ކޮންމެ މީހަކުވެސް ސަލާމަތްވުމަށް އަތުގައި ޖެހުނުއެއްޗެއްގައިވިއްޔާ ހިފިއެވެ. ނަމަވެސް ރާޅުގެ ބާރުގަދަކަމުން އެއްޗެއްގައި ހިފިޔަސް ހަރުލާވަރެއް ނުވެއެވެ.

ކުއްލިއަކަށް އަސްލަމަށް ފެނުނީ ކުޑަކުއްޖަކު ވެއްޓެމުންދިޔަ ފާރެއްގެ ދަށުވާތަނެވެ. އަސްލަމް އެކުއްޖާ ސަލާމަތް ކުރުމަށް އެދިމާއަށް ދާން މަސައްކަތް ކުރިއެވެ. އޭނާ އެކުއްޖާގެ އަތުގައި ހިފާ އެތަނުން ނިކުތުމަށް ހިނގައިގަތެވެ. ނަމަވެސް އަސްލަމަށް އެތަނުން ނިކުމެވޭ ވަރެއް ނުވިއެވެ. ވެއްޓެމުން ދިޔަ ފާރުގެ ބައެއް އައިސް އަސްލަމްގެ ބޯމައްޗަށް ވެއްޓުނެވެ. އަސްލަމަށް ހަޅޭއްލަވައިގަނެވުނެވެ.

އަސްލަމަށް ހޭވެރިކަންވީއިރު އޮތީ ހޮސްޕިޓަލްގައެވެ. އޭނާ ވަށައިގެން ވާ މާހައުލަށް ބަލާލިއެވެ. އެއްވެސް މީހަކު ފެންނާކަށް ނެތެވެ. އަސްލަމް ތެދުވެ ހިނގައިގަންނަން މަސައްކަތް ކުރިއެވެ. އެހެން ނަމަވެސް އޭނާގެ އަތާއި ފައި އޮތީ ބަނދެފައި ކަމުން ތެދުވެވޭ ގޮތެއް ނުވިއެވެ.

އަސްލަމް ވަރަށް ބާރަށް ހަޅެއްލަވަން ފެށިއެވެ. އެއަޑަށް އެތަނަށް ނަރުސް ކުއްޖަކުއައެވެ.

"އަހަރެން މީ ކާކު؟ މީ ކޮންތަނެއް؟ ކިހިނެއް އަހަރެން މިތަނަށް އައީ؟ ކީއްވެ އަހަރެން ބަނދެފަ މިއޮތީ؟ އެކުއްޖާ ފެނުމާ އެކީ އަސްލަމް އޭނާގެ ސުވާލުތައް ފައްޗަކަށް އަމުނާލިއެވެ. އެކުއްޖާ އެއްވެސް އެއްޗެއް ނުބުނެ ބަލަހައްޓައިގެން ހުރީއެވެ.

"އަހަރެން މި އަހަނީ އަހަރެން މީ ކާކުހޭ؟" އެކުއްޖާ އެއްޗެކޭ ނުބުނުމުން އަސްލަމް ތަންކޮޅެއް ބާރަށް ބުންޏެވެ.

ހިނގާ ދިޔަ ކާރިޡާ ގައި ވެއްޓެމުން ދިޔަ ފާރު އަސްލަމް ގެ ބޮލަށް ވެއްޓުމުގެ ސަބަބުން އަސްލަމްގެ ސިކުނޑިއަށް ވަނީ ވަރަށް ބޮޑަށް ގެއްލުން ވެފައެވެ. އެ ގެއްލުމުގެ ނަތީޖާއެއްގެ ގޮތުން، މީގެ ކުރިން ހިނގާފައިވާ ހުރިހާ ކަމެއް ވަނީ އަސްލަމްގެ ހަނދާނުން ފޮހެވިފައެވެ. އެންމެ ކުޑަމިނުން އޭނާގެ ނަންވެސް އޭނާ ހަނދާނެއް ނެތެވެ. މިހާރު އޭނާއެކޭ މޮޔައެކޭ ތަފާތެއް ނެތޭ ބުނުމަކީ ދޮގަކަށް ނުވާނެއެވެ. ޑަކްޓަރުން ހެދި ޓެސްޓް ތަކުން އެނގުނީ އަސްލަމް ރަނގަޅު ކުރަން ވަރަށް އުނދަގޫވާނެކަމެވެ. ވަރަށް ބޮޑަށް ފަރުވާ ކުރެވިއްޖެ ނަމަ ނުވަތަ އަނެއްކާވެސް އެފަދަ ޝޮކެއް ސިކުނޑިއަށް ލިބިއްޖެ ނަމަ ފަހަރެއްގައި ރަނގަޅު ވެދާނެ ކަމަށް ޑަކްޓަރުން ބުންޏެވެ.

ދުވަސްތައް ފާއިތުވަމުން ދެއެވެ. އެގޮތުން މިއަދަކީ އަސްލަމް ހޮސްޕިޓަލްގައި އޮންނަތާ މަހެއް ވީދުވަހެވެ. އަޅާލާނެ މީހަކު ނެތުމުން އޭނާ ބަހައްޓަފައި ހުންނަނީ ހޮސްޕިޓަލްގައި ހުންނަ ހާއްސައެހީއަށް ބޭނުންވާ މީހުންގެ ބައިގައެވެ. އަސްލަމްގެ ބައްޕަ ވެސް މިހާރުވީ އަސްލަމްގެ މަންމަ މަރާލި ކަމުގެ ކުށުގައި އިންޑިޔާގެ ޖަލެއްގައި ހައްޔަރު ކޮށްފައެވެ. އަސްލަމްގެ މަންމައާއި ބައްޕަ ފިޔަވާ ދެން އާއިލާގެ މީހަކަށް ހުންނަނީ ބޮޑުބޭބެއެވެ. ބޮޑުބޭބެ ވަނީ ރަށަށް އެރި ބޮޑު ރާޅުގައި މަރުވެފައެވެ. ކުޑަ އާބާދީއެއްއޮންނަ އެރަށުން އަސްލަމް ފިޔަވާ އެއްވެސް މީހަކު އެ ކާރިޘާގައި ސަލާމަތެއް ނުވެއެވެ.

އަސްލަމްގެ ހާލު މިހާރު އެއްދުވަހުން އަނެއް ދުވަހަށް އަންނަނީ ރަނގަޅުވަމުންނެވެ. އަސްލަމް ބެލްކަނީގައި ހުރި ގޮނޑިއެއްގައި އިށީނދެލައިގެން އިނީ އޮއްސެމުންދާ އިރުގެ ރީތި މަންޒަރަށް ބަލަހައްޓައިގެންނެވެ. އެ ރީތި މަންޒަރުތައް ފެނުމުން އޭނާގެ ހިތަށް ކޮންމެވެސް ވަރެއްގެ ހަމަޖެހުމެއް ލިބޭ ކަހަލައެވެ. އަސްލަމް ސިއްސައިގެން ދިޔައީ ކޮންމެވެސް މީހަކު ގޮވާލުމުންނެވެ. އޭނާ އެނބުރި ފަހަތަށް ބަލާލިއެވެ. ފަހަތުގާ ހުރީ އަންހެން ކުއްޖެކެވެ.

-ނުނިމޭ-

=ކުރީގެ ބައިތައް=

ޕޯސްޓް ކުރީ dhi-burunu ތާރީޚް Tuesday, March 23, 2010. މިލިޔުން ހިމެމެނޭނީ ވާހަކަ . ވިދާޅުވަމުން ތިޔަ ގެންދަވާ ލިޔުމަށް އިސްތިރާކު ކުރައްވާ! އާރު.އެސް.އެސް..