ލެޕްޓޮޕްގެ ބެޓެރީ ގިނަދުވަހު ސަލާމަތުން ބެހެއްޓުމަށް ކުރެވިދާނެ ބައެއް ކަންތައް.

ޒަމާނަށް އަންނަމުންދާ ބަދަލުތަކާއެކީ މީހުންގެ ވިސްނުންވެސް މިއަދު މިވަނީ ބަދުވެފައެވެ. މިގޮތުން ޓެކްނޮލޮޖީއަށް ބަލާއިރު އިންސާނުންގެ ވިސްނުން ބަދަލު ވެފައިމިވަނީ މީގެ ކުރިން ހީވެސް ނުކުރާހާ ބޮޑަށެވެ. އެންމެ ފުރަތަމަ ގެންގުޅުނު ބޮޑެތި ފޮށިގަނޑުލީ ކޮމްޕިޔުޓަރުތައް ފްލެޓް ސްކްރީނަށް ބަދަލުވެ އެންމެ ފަހުން މިއަދު މިވަނީ ކުޑަކުޑަ ލެޕްޓޮޕަކަށް ބަދަލުވެފައެވެ. ގިނަމީހުން ލެޕްޓޮޕް ބޭނުން ކުރަނީ ކުޑަވެފައި ގެންގުޅެން ފަސޭހަވީމައެވެ. ބޭނުންތާކަށް ހިފައިގެން ދާން ވީއެވެ. ބޮޑެތި ކޮމްޕިޔުޓަރުން ކުރެވޭ ބޭނުންތައްއެއިން ކުރެވެއެވެ.

ކަން މިހެން ހުރިނަމަވެސް ލެޕްޓޮޕް ފަދަ އަގުބޮޑު އެއްޗެއް ގެންގުޅޭއިރު އޭގެ ރައްކާތެރިކަމަށްވެސް ކޮންމެވެސް ވަރަކަށް ބަލާލަން ޖެހެއެވެ. ހާއްސަކޮށް ލެޕްޓޮޕްގެ ބެޓެރިއަކީ ވަރަށް އަވަހަށް މައްސަލަ ދިމާ ވާ އެއްޗެކެވެ. މިލިޔުމުގައި މި އަލި އަޅުވާލަނީ ލެޕްޓޮޕްގެ ބެޓެރި ސަލާމަތް ކުރުމަށް ކުރެވިދާނެ ބައެއްކަންތައްތަކުގެ މައްޗަށެވެ.

ޔޫއެސްބީ ފަދަ ތަކެއްޗަކީ ގިނަ އަދަދަކަށް ބެޓެރީ ބޭނުންކުރާ ތަކެތިކަމުން އެފަދައެއްޗެއް ލެޕްޓޮޕާއި ގުޅާފައިވާނަމަ، އެ އެއްޗަކީ ބޭނުން ނުކުރާއެއްޗެއްނަމަ ރިމޫވް ކޮށްލާށެވެ. މިސާލަކަށް އެކްސްޓާނަލް މައުސް، ޕީސީކާޑު، ވައިފައި، އެކްސްޓާނަލް ސްޕީކާރ އަދި ބްލޫޓޫތް ފަދަ ތަކެތި ބޭނުން ނުކުރާނަމަ ކަނޑާލާފައި ބެހެއްޓުމުން ބޭކާރުވާ ބެޓެރީގެ އަދަދު އެތައްގުނައެއް މަދުކުރެވިދާނެއެވެ.

ސީޑީ ނުވަތަ ޑީވީޑީ ޑްރައިވް ބޭނުން ނުކުރާނަމަ ހުސްކޮށް ބެހެއްޓުމަށް ސަމާލުވާށެވެ. ޑްރައިވްއަށް ސީޑީއެއް ނުވަތަ ޑީވީޑީއެއް ލާފައިވާނަމަ ބޭނުން ކުރާ ބެޓެރީގެ އަދަދު އެތަށް ގުނައެއް އިތުރުވެއެވެ. ވީމާ މިކަމަށް ސަމާލު ވާށެވެ.

އެލްސީޑީ ސްކްރީންތަކަކީ ލެޕްޓޮޕްގެ ބެޓެރި ލައްކަ ކާލާއެއްޗެކެވެ. އެހެންކަމުން ސްކްރީންގެ އަލި ވީހާވެސް މަޑުން ބަހައްޓައިގެން ބޭނުން ކުރުމަކީ ލެޕްޓޮޕްގެ ބެޓެރި ސަލާމަތް ކުރުމަށް ކުރެވިދާނެ މުހިންމު ކަމެކެވެ.

ސްކްރީންސޭވާ ބޭނުން ކުރާނަމަ ލެޕްޓޮޕް ގެ ބެޓެރި ވަރަށް އަވަހަށް ދުއްވާލައެވެ. ފޯނު ތަކުގައިވެސް ހަމަ މިފަދައެވެ. އެހެން ކަމުން ސްކްރީން ސޭވާރ އޮފް ކޮށްފައި ބަހައްޓަވާށެވެ.

ފަހުގެ އޮޕަރޭޓިން ސިސްޓަމްތަކަކީ ބޮޑެތި ގްރެފިކްސްތައް ހިމަނައިގެން ތައްޔާރު ކުރެވިފައިވާ އެއްޗެކެވެ. މިގޮތުން "އެރިއޯ ގްލާސް" އަކީ މިފަދަ ފީޗާއެކެވެ. މިފަދަ ގްރެފިކްސް އެއް ބޭނުން ކުރުމުގެ ބަދަލުގައި "ކްލެސިކް" އެޕިއަރެންސް އެއް ބޭނުން ކުރުމަކީ ލެޕްޓޮޕްގެ ބެޓެރި ގިނަދުވަހަށް ދެމެހެއްޓުމަށް ވަރަށް މުހިންމު ކަމެކެވެ.

ސްޓޭންޑް ބައި ނުވަތަ ސްލީޕް މޯޑުގައި ލެޕްޓޮޕްގެ ހާޑް ޑްރައިވާއި ޑިސްޕްލޭ ނިވެއެވެ. ނަމަވެސް މެމޮރީ ބަރާބަރަށް މަސައްކަތްކުރެއެވެ. މިހެން ވުމުގެ ސަބަބުން ބެޓެރި ބޭނުން ކުރެއެވެ. އެހެންވީމާ ސްލީޕް މޯޑުގެ ބަދަލުގައި ހައިބަނޭޓަށް ލާފައި ބެހެއްޓުމަށް ސަމާލުކަން ދެއްވާށެވެ.

ގިނަ ޕްރޮގްރާމްތަކެއް އެއްފަހަރާ ހުޅުވާފައި ހުރެއްޖެނަމަ ހަމގައިމުވެސް ބޭނުން ކުރާ ބެޓެރި ގިނަވާނެކަމީ ޝައްކެތް އޮތްކަމެއްނޫނެވެ. އެހެންކަމުން ކޮންމެހެން ބޭނުންވާ ޕްރޮގުރާމްތައް ހުޅުމަށް އިސްކަމެއްދެއްވާށެވެ. އަދި މީގެ އިތުރުން ގޭމްފަދަ ތަކެތި ކުޅުމަކީ ބެޓެރި ހުލިކޮށްލާކަމެކެވެ.

އަހަރެމެންގެ ދިރިއުޅުމުގައިވެސް ސާފް ތާހިރުކަމަކީ މުހިންމު ކަމަކަށް ވީ ފަދައިން މިފަދަ ތަކެތި ގެންގުޅުމުގައިވެސް އެތަކެތީގެ ސާފުތާހިރު ކަމަކީ ވަރަށް މުހިންމު ކަމެކެވެ. ހިރަފުސްފަދަ ތަކެތީގެ ސަބަބުން ގިނަ މައްސަލަތަކާ ކުރިމަތިލާން ޖެހުމަކީ ދުރުކަމެއްނޫނެވެ. އެހެންކަމުން ސާފްކޮށް ބެލެހެއްޓުމަށް ސަމާލުކަމެއް ދެއްވާށެވެ.

މިހިމަނާލެވުނީ ލެޕްޓޮޕްގެ ބެޓެރި ގިނަދުވަހު ސަލާމަތުން ބެހެއްޓުމަށް ކުރެވިދާނެ ބައެއް ކަންތައްތަކެވެ. މީގެއިތުރުންވެސް ވަރަށް ގިނަ ކަންތައް ހުންނާނެ ކަމީ ޝައްކެތް އޮތްކަމެއްނޫނެވެ. މި ހުށައަޅާލެވުނު މަޢުލޫމާތު ކޮޅަކީ ފައިދާ ކުރަނިވި މަޢުލޫމާތުކޮޅަކަށް ވާނެކަމަށް އުންމީދު ކުރަމެވެ.

ޝުކުރިއްޔާ!

ޕޯސްޓް ކުރީ dhi-burunu ތާރީޚް Thursday, March 25, 2010. މިލިޔުން ހިމެމެނޭނީ ޓެކްނޮލޮޖީ . ވިދާޅުވަމުން ތިޔަ ގެންދަވާ ލިޔުމަށް އިސްތިރާކު ކުރައްވާ! އާރު.އެސް.އެސް..