ކުރުސި - ޝައިޠާނާގެ ނުބައިކަމުން ސަލާމަތް ވުމަށް އޮތް ހަތިޔާރު

މިއީ ޢާޔަތުލް ކުރުސި އެވެ. މާތް ﷲގެ ޙައްޤު ތަޢުރީފް ބަޔާންވެގެންވާ ޢާޔަތެކެވެ. މިއާޔަތުގައި އެއިލާހުގެ ރަސްކަންފުޅާއި މިލްކިއްޔާތުގެ ބޮޑުކަން އަންގައިދީފައިވެއެވެ.
އިމާމް އަބޫދާވޫދާއި ޙާކިމާއި އިބްނު ޙިއްބާން، އުބައްޔު އިބްނު ކަޢުބް ރަޟިޔަﷲ ޢަންހްގެ ކިބައިން ރިވާކުރައްވާފައިވެއެވެ. އެކަލޭގެފާނު ވިދާޅުވިއެވެ.



ތިމަން ކަލޭގެފާނުގެ އަތްޕުޅު ގައި ކަދުރު ރައްކާކުރާ ކޮށާރެއް ހުރެއެވެ. އެތަނުން ކޮންމެ ދުވަހަކު ކަދުރު މަދުވަމުން ދާކަން ތިމަން ކަލޭގެފާނަށް އިޙްސާސު ވާން ފެށުމުން އެއްރެއަކު އެތަނުގައި ފާރައަށް ހުންނެވީމެވެ. އެހިނދު ތިމަންކަލޭގެފާނަށް ފެނި ވަޑައިގަތީ ޒުވާނެއްގެ ސިފައިގައި ހުރި ދާއްބަ އެކެވެ. ތިމަންކަލޭގެފާނު ސަލާމް ގޮވީމެވެ. އޭނާ ސަލާމުގެ ޖަވާބުދިނެވެ. އެހިނދު ތިމަން ބުނީމެވެ. ތިޔައީ ކާކުހެއްޔެވެ؟ އިންސިއެއް ހެއްޔެވެ؟ ނުވަތަ ޖިންނިއެއް ހެއްޔެވެ؟ އޭނާ ޖަވާބުގައި ބުންޏެވެ. ޖިންނިއަކީމެވެ. ތިމަން ބުނީމެވެ. އަތް ދިއްކޮށްލަ ބަލާށެވެ. އެހިދު އޭނަގެ އަތް ތިމަން ކަލޭގެފާނާއި ދިމާއަށް ދިއްކުރިއެވެ. ތިމަންކަލޭގެފާނު އޭނަގެ އަތަށް ބެއްލެވީމެވެ. އެއީ ކުއްތާއެއްގެ އަތާއި ވައްތަރު އަތެކެވެ. އަދި އަތުގައި ހުރީ ކުއަތާއެއްގެ ކެހެރިއާއި ވައްތަރު އިސްތައްޓެވެ.
ތިމަން ބުނީމެވެ: " ޖިންނިން އުފައްދަވާފައިވަނީ މިގޮތަށް ހެއްޔެވެ؟ "
އޭނާ ބުންޏެވެ: ޖިންނިން ދަންނަ ގޮތުގައި އެއުރެންގެ ތެރޭގައި ތިމަންނައަށް ވުރެން ވެސް ގަދަފަދަ ޖިންނިން އުޅެއެވެ.
ތިމަން ބުނީމެވެ: " ކަލޭ ތިޔަކަންތައް ކުރަނީ ކޮން ސަބަބަކާ ހުރެހެއްޔެވެ؟ "
އޭނާ ޖަވާބު ދިނެވެ: ކަލޭގެފާނު މުދަލުން ޞަދަޤާތް ދެއްވާ ޚަބަރު އަހަރުމެންނަށް ލިބުނީއެވެ. އެހެންކަމުން ކަލޭގެފާނުގެ މުދަލުން ކާނެ އެއްޗެއް ހޯދުމުގެ ގޮތުން އައީއެވެ.
ތިމަން ބުނީމެވެ: " ކަލޭމެންގެ ކިބައިން އަހަރުމެންނަށް ސަލާމަތް ވެވޭނެ ގޮތެއް އޮވޭހެއްޔެވެ؟ "
ޖަވާބުގައި އޭނާ ބުންނެވެ: އެއީ އާޔަތުލް ކުރުސި އެވެ. (اللّهُ لاَ إِلَـهَ إِلاَّ هُوَ الْحَيُّ الْقَيُّومُ ..........) ބަޤަރާ ސޫރަތުގެ މިއާޔަތެވެ. މީހަކު އިރާކޮޅުގައި (ނުވަތަ ހަވީރުގައި) މިއާޔަތް ކިޔަވައިފިނަމަ އެދުވަހުގެ ފަޖުރު ލައިފުމަށް ދާންދެން އަހަރެމެންގެ ކިބައިން (ޝައިޠާނާގެ ކިބައިން) އޭނާ ސަލާމަތް ވާނެއެވެ. އަދި މީހަކު ހެދުނުގައި މިތަން ކިޔަވައިފިނަމަ އިރު އޮއްސިއްޖައުމަށް ދާންދެން އަހަރެމެންގެ ކަބައިން އޭނާ ސަލާމަތްވާ ހުއްޓެވެ. ދެން ތިމަން، ހެނދުނު ހެނދުނާ ކީރިތި ރަސޫލުﷲ z އަރިހަށް ގޮސް މިވާހަކަ ދެންނެވުމުން، އެކަލޭގެފާނު ޙަދީޘް ކުރެއްވިއެވެ. " އެއީ އިބްލީހެވެ. އެކަލޭގެ އެބުނީ ތެދުބަހެކެވެ. "
(މިޙަދީޘް އިބްނު ކަޘީރު ވެސް ބަޔާން ކުރެއްވިއެވެ. އަދި މިއީ ޞައްޙަ ޙަދީޘެއްކަމުގައި އެކަލޭގެފާނު ވިދާޅުވެއެވެ.)