އަމިއްލައަށް މަރުވުމަކީ ހައްލެއްނޫނެވެ.

އަހަރެންނަކީ ޒުވާން އުމުރުގެ އެންމެ ޒުވާންދުވަސްވަރު ގުނަމުންދާޒުވާނަކީމެވެ. އެހެން ގޮތަކަށް ބުނާނަމަ ޓީނޭޖޭ މިކިޔާ އުމުރުގެ މީހަކީމެވެ. އަހަރެން ދެކޭގޮތުގައި މި ދުނިޔެއަކީ އަހަރެން ބޭނުން ކޮންމެ ކަމެއް ކުރަން އޮތް ތަނެކެވެ.
ހިތަށް އެރިގޮތަކަށް އުޅެން ވީއެވެ. ހިތަށް އެރިހާ ކަމެއް ކުރަން ވީއެވެ. ފަހުން އަތުވެދާނެ ދުވަހެއް އޮތް ކަމަކަށް އަހަރެން ގަބޫލެއްނުކުރަމެވެ. އަދި ކިއެއް ހެއްޔެވެ؟



ކަލަކު ވޮޑިގެން ވާކަމެއްވެސް އަހަރެން ނުދެނަ ހުރީމެވެ. ދީނޭ މިކިޔާ އެއްޗަކީ އަހަރެން ދުވަހަކު އަޑު އެހިއެއްޗެއްވެސް ނޫނެވެ.

މިހުރިހާ ކަމެއް މިހެން ހުރި އިރު އަހަރެން ބޮޑުވަމުން އައީ މަންމަ އާއި ބައްޕަގެ ގާތުގައެވެ. އެއިން އެއްވެސް މީހެއްގެ ކިބައިން ވެސް އެކަހަލަ ކަމެއް އަހަރެން ނުދެކެމެވެ. ބައްޕަ އަކީ ބޯޓް ދަތުރު ކުރާމީހެކެވެ. ބައްޕަ އަހަރެންނަށް ފެންނަނީ އަހަރަކު އެއްފަހަރު ނުވަތަ ދެއަހަރުން އެއް އަހަރެވެ. އެހެންވެ ބައްޕައަކީ ކޮންގޮތަކަށް ކިހިނެއް އުޅޭ މީހެއްކަމެއް އަހަރެނ ނުދެނަ ހުރީމެވެ. އަހަރެންނަށް އެނގިފައި އޮތީ މިދުނިޔޭގެ ހުރިހާވެސް އުފަލަކީ ފައިސާ އާއި އުފާ ކަމުގައެވެ. އެހެންވެ ފައިސާ ހޯދަންވެގެން ބައްޕަ ބޯޓް ދަތުރު ކުރަނީއެވެ.

މަންމަގެ ހާލު ވަކިން ބޮޑެވެ. މަންމަގެ ހުރިހާވެސް ކަމަކީ ޓީވީން ދައްކާ ޑްރާމާތަށް ބެލުމެވެ. އިރުއަރާނީ ޓީވީ ދަށުގައި އިންދައެވެ. އިރުއޮށްސޭނީވެސް ހަމަ އެހާލުގައި ވަނިކޮށެވެ. ގޭތެރޭގެ ހުރިހާ މަސައްކަތެއް ކުރާނީ ގޭގައި ގެން ގުޅޭ ބޭރުމީހެކެވެ. މަންމަގެ ފަރާތުންވެސް އަހަންނަކަށް އެއްވެސް އަޅާލުމެއް ނުލިބެޔޭ ބުންޏަކަސް ދޮގަކަށް ނުވާނެއެވެ. އަހަރެން އުޅެނީ ކޮންތާކު ތޯ ކުރަނީ ކޮން ކަމެއްތޯ ބަލާލާނެ ވަގުތެއް މަންމަ އަކަށް ނުވެއެވެ. މަންމަ ވެސް ދަނީ އަހަރެންނަށް އެނގިފައި އޮންނަފަދައިން މި ދުނޭގެ އަރާމާއި އުފާ ހޯދަމުންނެވެ.

އެންމެ ފަހުން އަހަރެންނަށްވެސް މަޖުބޫރުވީ އަހަރެންގެ ހިތްހަމަ ޖެހުން ހޯދަން މަގުމައްޗައް ނިކުންނާށެވެ. އޭގެ ނަތީޖާ އަކަށްވީ ނުބައި މީހުންނާއި ގުޅެވުމެވެ. އަހިވަކަކާ ޖެހި އަހިވަކެއް ފާވާނެޔޭ ބުނާ އުސޫލުން އެންމެ ފަހުން އަހަރެންވެސް އަހިވަކަކަށްވެ ފާވެއްޖެއެވެ. އެންމެ ފުރަތަމަ އަހަރެން ސިނގިރެޓެއް ބޯލީ މަޖަލަކަށެވެ. ނަމަވެސް މަޖަލަށް ބޯންފެށި ސިނގިރެޓް އެންމެ ފަހުން ބަދަލުވީ މަސްތުވާ ތަކެއްޗަށެވެ. އެންމެ ފަހުން އޭގެ އަވައިގައި ހަމަ ރަނގަޅަށްވެސް އަހަރެން ޖެހިއްޖެއެވެ.

މިހާރު އަހަރެންނަކީ މި ދުނިޔޭގައި ހުރި އެންމެ އުފާވެރި އެންމެ ހިތް ހަމަ ޖެހޭ މީހާއެވެ. އާއެކެވެ! މިހާރު އަހަންނަށް ނުކުރެވޭނެ ކަމެއް ނެތެވެ. މީހަކު މަރާލިޔަސް އަހަރެން ކުށްވެރިއެއް ނުވާނެއެވެ. އެއްދޮރުން ވައްދާފައި އަނެއް ދޮރުން ނެރޭނެކަން އަހަންނަށް އެނެގެއެވެ. ވައްކަން ކުރިޔަސް، ފޭރުނަސް އަދި އެހެން ކަމެއް ކުރިޔަސް ހަމައެފަދައެވެ. މިކަންތައް މިހެން ހުރުމުގެ ސަބަބުން އިތުރަށް އަހަންނަށް ހިތްވަރުލިބެއެވެ. އަހަރެންގެ އަތުން މަރާލީ ކިތަށް މީހުން ކަމެއް ޚުދު އަހަންނަކަށްވެސް ނޭނގެއެވެ. ޢިއްފަތްތެރިކަން ފޭރި ގަނެވުނު އަންހެން ކުދިންގެ އަދަދު އަހަރެން ހަނދާނެއް ނެތެވެ. ވައްކަން ކުރެވުނީ ކިތައް ތަނުން ކިތަށް މީހުން އަތުން ކަމެއް ގުނާ އަދަދު ނުކުރެވޭނެއެވެ. މިއީ އަހަރެންގެ އުފާވެރި ދިރި އުޅުމުގެ ވާހަކައެވެ.

ދުވަހަކަށްފަހު ދުވަހެއް ހަޔާތުން ފާއިތުވެގެން ދެއެވެ. ކޮންމެ ދުވަހަކީވެސް ހަމަ އެއްކަހަލަ ދުވަހެކެވެ. އުފާވެރި ދުވަހެކެވެ. ނަމަވެސް.... ނަމަވެސް މިއަދު އަހަރެންގެ އެނބުރެމުން ދައުރު ކުރަމުން ދިޔަ އުފާވެރި ކަމުގެ ދުނިޔޭގެ އެނބުރުން ހުއްޓިއްޖެއެވެ. ދެން އެއްގޮތަކަށްވެސް އެނބުރެން ދައުރު ކުރަން ނުފަށާނެވަރަށެވެ. އާއެކެވެ! އަހަރެންގެ ބައްޕަގެ ކުއްލި މަރުގެ ހަބަރު ލިބުމުން ކުރެވުނީ ބަޔާން ކުރަން ނޭނގޭފަދަ އިހުސާސް ތަކެކެވެ. އެފަދަ އިހުސާސް ތަކެއް އަހަންނަށް ކުރިން ނުވީ ކީއްވެގެން ހެއްޔެވެ؟ އެދުވަހު އަހަރެން ވަރަށް ދެރަވިއެވެ. އެކަނިމާ އެކަނި އިނދެ އެތަށް އިރަކު ރުއީމެވެ. އަހަރެންގެ ހިތަށް އެރިއެވެ. އަހަރެންވެސް އެހެން މީހުންގެ މަންމަ އާއި ބައްޕަ އަދި ދަރިން މެރި އިރު އެމީހުންވެސް ހާދަ ދެރައެއް ވާނެތާއެވެ. ހަމަ މިގޮތަށް އެމީހުންވެސް ރޯނެތާއެވެ.

މި ހިޔާލުތައް އައުމުން އަހަރެންގެ ހިތަށް އެއްގޮތަކަށްވެސް ކެތެއް ނުކުރެވުނެވެ. އަހަރެން ބޭނުންވީ އަމިއްލައަށް މަރުވާށެވެ. މި ދުނިޔެ ދެކެ އަހަރެން ފޫހިވެއްޖެއެވެ. މި ދުނިޔޭގައި އެންމެ ހިނދުކޮޅަކަށްވެސް ހުންނާކަށް އަހަރެން ބޭނުމެއް ނޫނެވެ.

ގެއިން ނިކުމެ ހިނަގައި ގަތީ ފިހާރައަކާ ދިމާލަށެވެ. ދަން ޖެހެން ވާގަނޑެއް ގަންނާށެވެ. ގެއާއި ކައިރި ހިސާބެއްގައި އެކަހަލަ ތަކެތި ވިއްކާ ފިހާރައެއް ނުހުރެއެވެ. އެހެންވެ ދާން ޖެހުނީ ތަންކޮޅެއް ދުރު ހިސާބަކަށެވެ. އެހިސާބުގަނޑަކީ އަހަރެން މީގެ ކުރިން ގޮސްއުޅުނު ހިސާބެއްނޫނެވެ. ވަކި ހިސާބަކަށް ދެވުނު ތަނާ އަހަރެންނަށް ފެނުނީ ވަރަށް ރީތިކޮށް ހަދާފައިވާ އިމާރާތެކެވެ. އެހިސާބަށް އަހަރެން އެރިއިރު އެތަނުން ބަޔަކު މީހުން ނިކުމެއެވެ. އެތަކުން ބައެއްމީހުންގެ ބޮލުގައި ތާކިހަލެއްފާޑުއެއްޗެއް އަޅާފައި އޮތެވެ. އަހަރެން އެތަނުން މުސްކުޅި ވަރެއްގެ މީހަކާއި ކައިރި ވެލާފައި މިއީ ކޮން ތަނެއްތޯ ސުވާލު ކުރީމެވެ. އެމީހާގެ ދެލޯބޮޑުވިއެވެ. އެމީހާގެ މޫނުން ފެނުނީ ހައިރާން ކަމެވެ. އެމީހާވެސް އަހަރެންނާ ކުރީ ސުވާލެކެވެ. އެއީ ހަމަ ކޮން ތަނެއްކަން ނޭނގެނީހެއްޔެވެ؟ އަހަރެން އާއެކޭ ބުނީމެވެ. އެމީހާ އެއީ މިސްކިތެކޭ، ކޮށްކޮތީ ކޮން ދީނަކަށް އުޅޭ ކުއްޖެއްހޭ އަހަރެންނާއި ސުވާލު ކުރިއެވެ. އަހަރެން ޖަވާބުގައި އަހަރެން މީ އެއްވެސް ދީނަކަށް އުޅޭ މީހެއްނޫނޭ ބުނީމެވެ. އަދި އަހަރެން އުޅެމުން އައި ގޮތާއި ކަންތައްތައް ވެގެން އުޅޭގޮތް އަހަރެން ކިޔައިދިނީމެވެ. މިވާހަކަތައް އަޑުއަހާފައި އެމީހާ ބުންޏެވެ. އަމިއްލައަށް މަރު ވުމަކީ ހައްލެއް ނޫނެވެ. ހައްލަކީ އިސްލާމް ދިނެވެ.

އެމީހާ އަހަރެންނަށް އިސްލާމް ދީނަށް ވަނުމަށް ދަޢުވަތު ދިނެވެ. އަދި އަހަރެންވެސް އެމީހާގެ ދަޢުވަތު ގަބޫލުކޮށް އިސްލާމްދީނަށް ވަނީމެވެ. އެދުވަހަށްފަހު އަހަރެންނަކީ ފުރިހަމަ މުސްލިމެކެވެ. މާތްﷲއަށް އީމާން ވަމެވެ. އެކަލާނގެ ފިޔަވާއެހެން އިލާހަކު ނުވާކަމަށް ހެކިވަމެވެ. އަދި މުހައްމަދުގެ ފާނީ އެކަލާނގެ ރަސޫލާކަން ގަބޫލު ކުރަމެވެ. އަހަރެންގެ ދީނަކީ އިސްލާމްދީނެވެ. އަހަރެންގެ ދިރިއުޅުން މިއަދު މިވަނީ އެންމެ އުފާވެރި މަގުގައެވެ. އެދުވަހު އަހަރެން ދަންޖެހި މަރުވިނަމަ މި އުފާވެރިކަމެއް ނުލިބޭނެއެވެ. މުސްކުޅިބޭ އެބުނީ ތެދެކެވެ. އަމިއްލައަށް މަރުވުމަކީ ހައްލެއްނޫނެވެ. ހައްލަކީ އިސްލާމް ދީނެވެ.

ޕޯސްޓް ކުރީ dhi-burunu ތާރީޚް Friday, March 12, 2010. މިލިޔުން ހިމެމެނޭނީ ވާހަކަ . ވިދާޅުވަމުން ތިޔަ ގެންދަވާ ލިޔުމަށް އިސްތިރާކު ކުރައްވާ! އާރު.އެސް.އެސް..