އިސްލާމިކް މިނިސްޓްރީ ނިދާފައި އޮތީ ކީއްވެގެންބާ؟

މިހާރު ދިވެހިރާއްޖޭގެ މީޑިޔާގއި އެންމެ ފޯރިއާއި އެކު ދެކެވޭ އެއްވާހަކައަކީ މަޝްހޫރު އާރް އެންޑްބީ ލަވަކިޔުންތެރިޔާ އޭކަންގެ ކޮންސެޓެއް ރާއްޖޭގައި ބާއްވަން އުޅޭ ވާހަކައެވެ. މީނާގެ މި ކޮންސެޓް ރާއްޖޭގައި ބާއްވާ ގޮތަށް ހަމަޖެހުނީ ކުރިން ކޮންސެޓް ބާއްވަން ހަމަޖެހިފައި އޮތް ސްރީލަންކާއިން އޭނާއަށް ވިސާނުދިނުމުގެ ސަބަބުން ކަމަށް ވެއެވެ. އޭނާއަށް ވިސާ ނުދިނީ އެމީހުންގެ ބުއްދާއަށް ހުތުރުވާގޮތަށް އެމީހުންގެ ދީނަށް ފުރަށްސާރަ ވާފަދަ މަންޒަރެއް އޭކަންގެ ލަވައެއްގައި ފެންނާތީއެވެ.

މި ހަބަރު ފެތުރުމާގުޅިގެން އެކިފަރާތްތަކުންދަނީ އެކި ޝުޢޫރުތަށް ފާޅު ކުރަމުންނެވެ. މިކަމާ އިދިކޮޅަށް ވާހަކަ ދައްކާ ފަރާތްތަކުން ބުނަމުންދަނީ މިފަދަ ކަމެއް ރާއްޖޭގައި ހިންގައިގެން ނުވާނެކަމުގައެވެ. އެކަމުގެ ސަބަބުން އަހަރެމެންގެ މުޖުތަމަޢުގައި ލާދީނީ ގޮތްތަށް އާންމުވެ މިހާރަށް ވުރެ އިސްލާމްދީނާއި ބީރަށްޓިހިގޮތްތަށް އަހަރެމެންގެ ތެރެއަށް ތަޢާރަފް ވެދާނެކަމުގައެވެ.
މިކަމާ އެއްކޮޅަށް ވާހަކަދައްކާ ފަރާތްތަކުގެ ޝުޢޫރުތަށް ހުރީ މިއާ މުޅިން އިދިކޮޅަށެވެ. އެމީހުން ބޭނުން ވަނީ ދުނިޔޭގެ އުފަލެވެ. އަރާމެވެ. ދުނިޔޭގެ ތަނަވަސް ކަމެވެ. ދީނާއި މުޖުތަމަޢަށް ކޮންމެ ގޮތެއް ވިޔަސް އެމީހުންނަށް ހެވެ. އެމީހުން ބުނަނީ އެކޮންސެޓްގެ ސަބަބުން ޓޫރިޒަމަށް އެތަށް ފައިދާ ތަކެއް ކުރާނެކަމަށެވެ. އެހެންވެ އަހަރެމެންގެ ސަރުކާރުންވެސް ވަނީ އޭކަންގެ ކޮންސެޓަށް މަރުހަބާ ކިޔާކަން ހާމަ ކޮށްފައެވެ. ރައީސްގެ ޕްރެސް ސެކްރެޓަރީ ބުނެފައި ވަނީ އޭނާ (އޭކަން) އައިސް ކޮންސެޓް ހުށައަޅާދޭތީ އެމީހުން ވަރަށް އުފާވާކަމުގައެވެ.

މިއީ އިސްލާމީ ގައުމެއްގައި މިކަންކަން ވާންޖެހޭނެ ގޮތެއްނޫނެވެ. އަހަރެމެންނަކީ 100 ޕަސެންޓް މުސްލިމުންނަށްވީރިރު އަހަރެމެންގެ ތެރޭގައި މިފަދަ ލާދީނީ ކަންކަން ހިނގިޔަދީގެން ނުވާނެއެވެ. ސްރީލަންކާއިން އެމީހުންގެ ބުދުދީނަށް ހުތުރުވާހެން އޭކަންގެ ލަވައެއްގައި މަންޒަރެއް ހިމަނައިގެން އޭނާ އަށް ހުއްދަ ނުދިންހެން އަހަރެމެންގެ ރާއްޖެއިންވެސް އޭނާއަށް ހުއްދަ ދެވިގެން ނުވާނެއެވެ. އަހަރެމެންގެ އިސްލާމް ދީނަށް ހުތުރުވާހެން އޭނާ ކުޅެފައި ވަނީ ކިތަށް ލަވަކަމެއް ނޭނގެއެވެ. އެކަމުވެސް ހަމަ އަހަރެމެންގެ ސަރުކާރުން އޭނާއަށް މަރުހަބާ ކިޔާފައިވާތީ އަޅުގަނޑު ހަމަ ހައިރާންވެ އަންތަރީސްވެއްޖެއެވެ.
މިހާ ހިސާބުން އުފެދޭ ސުވާލަކީ ސަރުކާރުން މިފަދަ ނުބައި ކަމެއް ދިވެހި ފަސްގަނޑުގައި ކުރުމަށް ތައްޔާރު ވަމުން ދާއިރު އިސްލާމިކް މިނިސްޓްރީ ކޮބައިތޯއެވެ؟ އެމިނިސްޓްރީ އޮތީ ނިދާފައި ތޯއެވެ؟ ދީނީ ގޮތުން މިފަދަ ކަންކަމަށް ދިވެހި ރައްޔިތުން ހޭލުންތެރި ކުރުވަން ތިއްބެވީ ތިޔަމިނިސްޓްރީގެ ބޭފުޅުން ނޫން ދެން ކޮންބައެއްތޯއެވެ؟ އަޅުގަނޑަށް ހަބަރު ލިބިފައިވާ ގޮތުގައި މިހާތަނަށް އައިއިރު މިކަމާ ބެހޭގޮތުން އިސްލާމިކް މިނިސްޓްރީން އެއްވެސް ބަހެއް ބުނެފައެއްނުވެއެވެ. މިއީ ހިތާމަ ހުރިކަމެކެވެ. އަޅުގަނޑު އިސްލާމިކް މިނިސްޓްރީއަށާއި ދިވެހި ރައްޔިތުންނަށް މި ގޮވާލަނީ މިކަމާއި އިދިކޮޅަށްތެދުވުމަށެވެ. މިކަން ކުރިޔަ ނުދިނުމަށް ކުރެވެންހުރި ހުރިހާ ކަމެއް ކުރުމަށެވެ. އިސްލާމްދީނާއި ދިވެހި ގައުމަށްޓަކައެވެ.
ލިޔުނީ: އަލް އިސްލާހް

ޕޯސްޓް ކުރީ dhi-burunu ތާރީޚް Tuesday, April 06, 2010. މިލިޔުން ހިމެމެނޭނީ އެހެނިހެން, ދީން . ވިދާޅުވަމުން ތިޔަ ގެންދަވާ ލިޔުމަށް އިސްތިރާކު ކުރައްވާ! އާރު.އެސް.އެސް..