ކާމިޔާބު ލިބޭނީ އޭރުންނެވެ.

އޭ އެންމެހާ ލޮބިވެތި މުސްލިމް އަޚުންނާއި އުޚުތުންނޭވެ. ތިޔަބައިމީހުން މި ދުނިޔެއަށް ފޮނުއްވުނީ ކީއްކުރަން ކަމާމެދު ތިޔަބައިމީހުން އެންމެ ފަހަރަކު ނަމަވެސް ވިސްނާލީމުހެއްޔެވެ؟ ތިޔަބައިމީހުންގެ އަމިއްލަ ނަފުސުތަކާ ދޭތެރޭ އެންމެ ފަހަރަކުވެސް އަޅެ ވިސްނާ ފިކުރުކޮށްލިންހެއްޔެވެ؟

ނޫނެކެވެ. މިއިން އެއްވެސް ކަމަކާ ތިޔަބައިމީހުން ވިސްނައެއްނުލައެވެ. ތިމާމެން މަޝްޢޫލު ވެގެން އުޅެނީ ދުނިޔަވީ ކަންކަމުގައެވެ. ކުޅިވަރާއި މަޖަލުގައެވެ. ފޭސްބުކުން ގޭމް ކުޅުމުގައެވެ. މެސްއެސް އެން އިން ޗެޓްކުރުމުގައެވެ. މިގް 33 އިން މީހުން ހައްދާ ގޯސްވާހަކަތައް ދެއްކުމުގައެވެ. އަޅުގަނޑު ދަންނަވަން މިއުޅެނީ މިއީ ހަރާމް ކަންކަމޭ ނޫނެވެ. ނަމަވެސް ގޯސްގޮތުގައި ބޭނުން ކުރާނަމަ އެކަންކަންވެސް ހަރާމް ވާނެއެވެ. މިފަދަ ގޮތްގޮތަށް ދުނިޔޭގެ ދަޅައަށް ހެއްލިގެން އުޅޭ މީހުންނާ ބެހޭ ގޮތުން މާތްﷲ ވަހީ ކުރައްވަނީ މިފަދައިންނެވެ.

" ތިޔަބައިމީހުން ދަންނާށެވެ! ދުނިޔޭގެ ދިރިއުޅުންވާކަން ކަށަވަރީ ކުޅިވަރެއްކަމުގައެވެ. އަދި މަޖަލެއްކަމުގައެވެ. އަދި ޒީނަތެއް ކަމުގައެވެ. އަދި ތިޔަބައިމީހުންގެ މެދުގައި އެކަކު އަނެކަކުގެ މައްޗަށް ބޮޑާވެގަތުމެއް ވެއެވެ. އަދި މުދާތަކާއި ދަރިންތަކާމެދު އެކަކު އަނެކަކަށްވުރެ ގިނަކަމަށްބުނެ މޮޅުވާހަކަ ދެއްކުމެއްކަމުގައެވެ. ވާރޭ ފެނެއްގެ މިސާލުގައެވެ. އެފެނުން ފެންލިބިގެން ފެޅިގަސްތަކެއް ދަނޑުވެރިން ޢަޖައިބު ކޮށްފައިވެއެވެ. ދެން އެގަސްތައް ހިކިދެއެވެ. ދެން އެގަހުގެ ފަތްތަށް ރީނދޫ ވެފައި ވަނިކޮށް ތިބާއަށް ފެންނާނެތެވެ. ދެން އެހިކި ހުއިތަކަކަށް ވެދެއެވެ. އަދި އާޚިރަތުގައިވަނީ ގަދަފަދަ ވެގެންވާ ޢަޛާބެވެ. އަދި ﷲގެ ހަޟުރަތުންލިބޭ ފާފަފުއްސެވުމަކާއި، ރުއްސެވުމެކެވެ. ކެހިވެރިކަމުގެ ވަގުތީ އުފަލެއްދޭ އެއްޗެއްކަމުގައިމެނުވީ ދުނިޔޭގެ ދިރިއުޅުން ނުވެއެވެ."

އޭ އެންމެހާ އަޚުންނާއި އުޚުތުންނޭވެ! ހަމަ އެކަނި ޝަހާދަތުގެ ދެކަލިމަ ދުލުން ކިޔާލުމަކުން އަދި އިސްލާމަކަށް ނުވެވޭނެއެވެ. މީގެ އިތުރުންވެސް ކުރަންޖެހޭ ބައިވަރު ކަންތައްތަކެއް ހުރެއެވެ.މިގޮތުން ޝަހާދަތަށްފަހު ދެވަނައަށް އެމްނެ މުހިންމު ކަމަކީ ފަސްވަގުތު ބަރާބަރަށް ނަމާދުކުރުމެވެ. ނަމާދަކީ އިސްލާމް ދީނުގެ ތަނބެވެ. އަދި ނަމާދަކީ މުއުމިނުންގެ މައްޗަށް ވަގުތު ކަނޑައެޅިގެންވާ އަޅުކަމެކެވެ. މާތް ﷲ ގެ ވަހީ ބަސްފުޅުގެ މާނައިގައި ވަނީ މިފަދައިންނެވެ. " ހަމަކަށަވަރުން ނަމާދަކީ މުއުމިނުތަކުންގެ މައްޗަށް ވަގުތު ކަނޑައެޅިގެންއޮތް އަޅުކަމެއްކަމުގައިވެއެވެ." ނަމާދު ގާއިމްނުކުރާ މީހުންނަށް ގަދަފަދަ ޢަޒާބު އެކަލާނގެ ތައްޔާރު ކުރައްވާފައިވެއެވެ. އެހެންކަމުން ވަގުތުން ވަގުތަށް ނަމާދު ކުރުމަށް ސަމާލުކަމެއް ދޭންޖެހެއެވެ. މާތް ﷲ ވަހީ ކުރައްވާފއި ވަނީ މިފަދައިންނެވެ. " ނަމާދު ކުރުންމަތީ ދެމިތިބުމަށް ތިޔަބައިމީހުން ފަރުވާތެރިވާށެވެ. އަދި ނަމާދު ކުރުމާމެދު ތިޔަބައި މީހުން ފަރުވާކުޑަނުކުރާށެވެ."

ތިންވަނަ ކަމަކީ ރަމަޟާންމަހުގެ ރޯދަހިފުމެވެ. މާތް ﷲ ވަހީ ކުރައްވަނީ " އޭ އީމާން ވެއްޖެ މީސްތަކުންނޭވެ! ތިޔަބައިމީހުންގެ ކުރީގެ މީހުންގެ މައްޗައް ފަރުޟު ކުރެވުނު ފަދައިން ތިޔަބައިމީހުންގެ މައްޗައްވެސް ރޯދަ ފަރުޟުކުރެވިއްޖެއެވެ." ރޯދައިން އަހަރެމެންނަށް އެތަށް ފިލާވަޅުތަކެއްލިބިދެއެވެ. ކެތްތެރިކަމުގެ ރީތި ނަމޫނާ ރޯދައިން އަހަރެމެންނަށް ލިބިދެއެވެ. ދޮގުހެދުމާ މަކަރު ހެދުމާ، ޣީބަ ބުނުން ފަދަ ކަންތައްތަކުން ދުރުހެލިވެގެން ނޫނީ ފުރިހަމަ ރޯދައެއް ނުހިފޭނެއެވެ. އަދިވެސް އެހެން ގޯސްކަންތައްތަކުން ދުރުހެލިވާން ޖެހޭނެއެވެ. އެހެން ކަމުން ރޯދައކީ ރައްކާތެރިކަމެއްގެ ގޮތުގައި ސިފަކުރެވިދާނެއެވެ. ރަސޫލާ ސައްލައްﷲ އަލައިހި ވަސައްލަމަގެ ހަދީސް ބަސްފުޅުގައިވެސް ވަނީ މިފަދައިންނެވެ. " ރޯދައަކީ ރައްކާތެރިކަމެކެވެ."

ހަތަރުވަނަކަމަކީ ޒަކާތް ދިނުމެވެ. ޒަކާތަކީ ވިސްނާ ފިކުރު ކުރާބަޔަކަށް އޭގައި ގިނަ ހިކުމަތްތަކެއް އެކުލެވިގެންވާ ކަމެކެވެ. މިގޮތުން ޒަކާތުގެ އެންމެ މުހިންމު ކަމަކީ މުއްސަނދިންނާއި ފަގީރުން ހަމަހަމަ ކުރުމެވެ. މިއީ އިސްލާމް ދީނުގައި ތަފާތު ކުރުން ނެތްކަން ފެނިގެންދާ ރިވެތި ޢަމަލެކެވެ. އަދި ޒަކާތް ދިނުމުގެ ސަބަބުން މުދަލުގައި ބަރަކާތްލައްވައެވެ. މާތްﷲ ގެ ބަސްފުޅެއްގައި ވަނީ މިފަދައިންނެވެ. " އަދި ބާތިލް މަގުން އެއްކިބާވެ، ﷲ އަށް އަޅުކަން ޚާލިސް ކުރާ ހާލު ﷲއަށް އަޅުކަން ކުރުމަށާއި، ނަމާދު ޤާއިމް ކުރުމަށާއި، ޒަކާތް ދިނުމަށްމެނުވީ އެއުރެންނަށް އަމުރު ކުރައްވާފައެއް ނުވެއެވެ. އަދި ސީދާ ވެގެންވާ ދީނަކީ އެއީއެވެ."

ފަސްވަނަކަމަކީ ކުޅަދާނަ ވެގެންވާ މީހާ މާތް ﷲ ގެ ގެކޮޅަށްގޮސް ހައްޖުވުމެވެ. ހައްޖަކީވެސް އޭގައި އެތަށް ފިލާވަޅުތަކެއް އެކުލެވިގެންވާ އަޅުކަމެކެވެ. ޒަކާތެކޭ އެއްގޮތަށް ހަމަހަކަން ހައްޖުންވެސް ފެނިގެން ދެއެވެ. އެއްކުލައެއްގެ އެއްވައްތަރެއްގެ ހެދުމެއްއަޅައިގެން ތިބޭއިރު އެމީހުންނަކީ އެއްފަރާތަކަށް އީމާންވާ އެއްބައެއްވަންތަ ބައެއްކަން ދޭހަވެއެވެ. އަނެއްކޮޅުން ބަލާއިރު ހައްޖުވާން ދާމީހާ ދަނީ އޭނާގެ އަނބި ދަރިންނާއި ގެދޮރާ މުދާ ދޫކޮށްލައްފައެވެ. މީގެންވެސް ދޭހަވަނީ ދުނިޔޭގެ ދިރިއުޅުމަކީ އެއްވެސް އެއްޗެއްނޫންކަމެވެ.

މިބަޔާންކޮށްލެއްވުނީ އިސްލާމް ދީނުގައި ޝަހާދަތަށްފަހު އެންމެ މުހިންމު ކަންތައްތަކެވެ. މީގެ އިތުރުންވެސް ހެޔޮ ޢަމަލުގެ ގޮތުގައި ކުރެވިދާނެ އެހެނިހެން ކަންތައްތައްވެސް ހިމެނެއެވެ. މިސާލަކަށް ބުނާނަމަ ސަދަގާތް ދިނުމާއި ސުންނަތް ރޯދަ ހިފުމާއި ގިނަގިނައިން ގުރުއާން ކިޔެވުން ހިމެނެއެވެ.

އޭ އެންމެހާ އަޚުންނާއި އުޚުތުންނޭވެ! އަވަހަށް ﷲ ގެ މަގަށް ރުޖޫޢަވާށެވެ. ތިޔަބައިމީހުން ދުނިޔެއަށްފޮނުއްވުނީ އެކަލާނގެއަށް އަޅުކަން ކުރުމަށެވެ. މާތްﷲ ގެ ވަހީ ބަސްފުޅުގައި ވަނީ މިފަދައިންނެވެ. " ތިމަންރަސްކަލާނގެއަށް އަޅުކަންކުރުމަށްމެނުވީ ތިމަންރަސްކަލާނގެ ޖިންނިންނާއި އިންސީން ނެއް ނަހައްދަވަމެވެ." އެހެން ކަމުން ކާމިޔާބު އޮތީ އެކަލާނގެ މަގަށް ރުޖޫޢަވެގެންކަން ކަށަވަރެވެ. އަވަހަށް ފުރިހަމަވެގެންވާ ތައުބާވުމަކުން ތައުބާވާށެވެ.

= ލިޔުނި: އަލް އިސްލާހް=

ޕޯސްޓް ކުރީ dhi-burunu ތާރީޚް Wednesday, March 31, 2010. މިލިޔުން ހިމެމެނޭނީ ދީން . ވިދާޅުވަމުން ތިޔަ ގެންދަވާ ލިޔުމަށް އިސްތިރާކު ކުރައްވާ! އާރު.އެސް.އެސް..