އިސްލާމް ދީނަށް ފުރަށްސާރަ ކުރާ މީހުނަށް.

މާތް ﷲ ކީރިތި ޤުރުއާނުގައި ވަހީ ކުރައްވާފައިވާ ބަސްފުޅެއްގެ މާނައިގައި ވަނީ މިފަދައިންނެވެ. " ހަމަކަށަވަރުން ﷲގެ ހަޟުރަތުގައި ދީނަކީ އިސްލާމް ދީނެވެ." މި ބަސްފުޅުން އަހަރެމެންނަށް އެނގިގެން ދަނީ މާތް ﷲގެ ހަޟުރަތުގައި ގަބޫލު ކުރެއްވޭނެ

ދީނަކީ ހަމައެކަނި އިސްލާމް ދީން ކަމެވެ. އެހެން ދީން ތަކެއް އެކަލާނގެ ގަބޫލު ނުކުރައްވާނެ ކަމެވެ.


ކަން މިހެން އޮތް ނަމަވެސް އަހަރެމެންގެ މި ކުޑަ ކުޑަ ދިވެހި މުޖުތަމައަށް ނަޒަރު ހިންގާލުމުން ފެނިގެން ދަނީ ވަރަށް ހިތާމަ ކުރަން ޖެހޭ ކަހަލަ މަންޒަރުތަކެކެވެ. މި ދިވެހި ރާއްޖެއަކީ 100 ޕަސެންޓް މުސްލިމް ގައުމެކޭ ބުނާއިރު ފެނިގެން ނުވާނޭ މަންޒަރުތަކެކެވެ. އިސްލާމް ދީނަށް ފުރަށްސާރަކޮށް އެ ދީނަށް މަލާމަތްކުރާ މީހުން އަޅުގަނޑުމެންގެ ތެރޭގައި އުޅޭ ކަމީ ހިތާމަ ކުރަން ޖެހޭ ކަމެކެވެ. އަދި ހަމަ އެއާއެކު އެފަދަ ފަރާތް ތަކާ މެދު އަޅަންވާވަރަށް ފިޔަވަޅު ނޭޅޭ ކަމީވެސް ހިތާމަ ކުރަން ޖެހޭ ކަމެކެވެ.
އިސްލާމް ދީނަށް ފުރަށްސާރަކޮށް މަލާމާތް ކުރާ ފަރާތް ތަކުން ތަފާތު ގޮތްތޮތަށް ދަނީ މިފަދަ އަމަލު ތައް ކުރަމުންނެވެ. ތަފާތު ވެބްސައިޓްތަކާއި ބްލޮގް ތައް ހަދައިގެން މިފަދަ ފަރާތް ތަކުން ދަނީ އިސްލާމް ދީނަށް ފުރަށްސާރަ ކުރަމުންނެވެ. މިހާ ހިސާބުން އަޅުގަނޑުގެ ހިތުގައި އުފެދޭ ސުވާލަކީ މިހާ ފާޅުކަން ބޮޑުގޮތެއްގައި އިސްލާމްދީނަށް ފުރަށްސާރަ ކުރަމުން ދާއިރު އަޅުގަނޑުމެންގެ ސަރުކާރުން މިފަދަ ކަންކަމާ އަޅާ ނުލަނީ ކީއްވެގެން ބާވައެވެ؟ އެބޭފުޅުންނަކީ ދިވެހި ގައުމާ އިސްލާމްދީން ދިފާއު ކުރެއްވުމަށް ހުވާ ކުރައްވައިގެން ތިއްބެވި ބޭފުޅުންނަށް ވީހިނދު އެފަދަ އަމަލުތައް ކުރާ ފަރާތްތަކާމެދު ހަރުކަށި ފިޔަވަޅު އެޅުމަށް ގޮވާލަމެވެ.
ގާނޫނު އަސާސީގައި ދިވެހިންގެ ދީނަކީ އިސްލާމް ދީންކަން ބަޔާންކޮށްފައި ވާއިރު، އިސްލާމް ދީން ފިޔަވާ އެހެން ދީންތައް ފަތުރާ އަދި އިސްލާމް ދީނަށް ފުރަށްސާރަކުރާ ފަރާތް ތަކާމެދު ފިޔަވަޅު ނޭޅެންވީ އެއްވެސް ސަބަބެއް އޮތްކަމަކަށް އަޅުގަނޑު ނުދެކެމެވެ.
އިސްލާމްދީނަށް ފުރަށްސާރަކޮށް އުޅޭ ފަރާތްތަކަށް އަޅުގަނޑު ބުނެލަން ބޭނުން ވަނީ އެމީހުންނަށް މިއަދު އެކަން ކުރވިދާނެ އޭ އެވެ. ނަމަވެސް އަދި އަންނާނޭ ދުވަހެއް އެބައޮތެވެ. އެދުވަހުން ސަލާމަތެއް ނުވެވޭނެއެވެ. އަވަހަށް އިސްލާހުވެ ތައުބާ ވާށެވެ. އެހެން ނޫން ނަމަ މާތް ﷲ ގެ ކޯފާޔާ ކުރިމަތި ލާން ޖެހުމަކީ ދުރުގައިވާ ކަމެއްނޫނެވެ.

ދި-ބުރުނު

ޕޯސްޓް ކުރީ dhi-burunu ތާރީޚް Saturday, March 06, 2010. މިލިޔުން ހިމެމެނޭނީ އެހެނިހެން . ވިދާޅުވަމުން ތިޔަ ގެންދަވާ ލިޔުމަށް އިސްތިރާކު ކުރައްވާ! އާރު.އެސް.އެސް..