އިރު ހަލާކު ކުރެއްވުން- ސައިންސާއި ޤުރްއާނުގެ އަލީގައި

ދި-ބުރުނު
ކީރިތި ޤުރުއާނުގައި މާތްﷲ ވަހީ ކުރައްވަނީ މި ފަދައިންނެވެ. " وَالشَّمْسُ تَجْرِي لِمُسْتَقَرٍّ لَّهَا ذَلِكَ تَقْدِيرُ الْعَزِيزِ الْعَلِيمِ" މާނައީ: "އަދި އިރު އެއަށް ޤަރާރު ވަނިވި ތަނަކަށް ދާނދެން ހިނގަ ހިނގާ ހުރެތެވެ. އެއީ عزيز ވަންތަ، މޮޅަށް ދެނެވޮޑިގެންވާ ރަސްކަލާނގެ މިންވަރު ކުރައްވާފައިވާ ގޮތެވެ."
އިރަކީ އަހަރެމެންގެ މުޅި މި ކައުނުގެ ހަކަތަ އުފައްދައިދޭ އަސްލެވެ. ޕްލެނެޓްތައް އިރުގެ ވަށައިގެން ދައުރު ކުރާތާ ގާތްގަނޑަކަށް 5 މިލިޔަން އަހަރު ވެދާނެ ކަމަށް ސައިންސްވެރިން ހާމަ ކުރެއެވެ. މީގެ ނަތީޖާއެއްގެ ގޮތުން މި "އިރު"ވެސް ހަލާކުވެގެން ދާނެއެވެ. ކޮންމެވެސް ދުވަހަކުން އެ "އިރަށް" ވެސް ނިމުމެއް އަންނާނެކަން ސައިންސް ވެރިން ވަނީ ހޯދާފައެވެ. ސައިންސްވެރިންގެ މި ހޯދުން މީގެ އެތައް އަހަރެއް ކުރިން ބާވާލެއްވި ކީރިތި ޤުރުއާނުގައި ވަނީ ބަޔާންކޮށްދެއްވާފައެވެ. އާޚިރަތް ދުވަހުން އެ ކަލާނގެ އިރު ހަލާކު ކުރައްވާނެއެވެ. މަތީގައި ބަޔާން ކުރެވުނު އާޔަތް މި ކަމުގެ ހެއްކަކަށް ފުދެއެވެ.


އެ އާޔަތުގައި مُسْتَقَرٍّ މި ބަހުގެ މާނައަކީ ކަނޑައެޅިފައިވާ ވަކި ތަނެއް ނުވަތަ ވަގުތެކެވެ. އަދި تَجْرِي މި ބަހުގެ މާނައަކީ ހިނގަ ހިނގާހުރުމެވެ. މި ބަސްތަކުން ދޭހަވަނީ ކަނޑައެޅިފައިވާ ވަކި ވަގުތެއް ޖެހިއްޖެއުމަށްދާނދެން އިރު ހިނގަހިނގާ ހުންނާނެކަމެވެ. އަދި އެ ވަގުތު ޖެހުމުން އިރުގެ އަލިކަން ފިލައިގެން ދާނެކަމެވެ. އަންނަނިވި އާޔަތުގައި ﷲ މިކަމަށް އިޝާރާތްކުރަށްވާ ވަހީ ކުރަށްވަނީ " إِذَا الشَّمْسُ كُوِّرَتْ" މާނައީ: "އިރުގެ އަލިކަން ފިލައިދާ ހިނދެވެ."
ރަޢުދު ސޫރަތުގެ 2ވަނަ އާޔަތުގައި އެކަލާނގެ ވަހީ ކުރައްވަނީ؛ " اللّهُ الَّذِي رَفَعَ السَّمَاوَاتِ بِغَيْرِ عَمَدٍ تَرَوْنَهَا ثُمَّ اسْتَوَى عَلَى الْعَرْشِ وَسَخَّرَ الشَّمْسَ وَالْقَمَرَ كُلٌّ يَجْرِي لِأَجَلٍ مُّسَمًّى يُدَبِّرُ الْأَمْرَ يُفَصِّلُ الْآيَاتِ لَعَلَّكُم بِلِقَاءِ رَبِّكُمْ تُوقِنُونَ" މާނަ އަކީ: "ﷲ އީ ތިޔަބައި މީހުންނަށް ފެންނަ ތަނބުތަކާއި ނުލާ އުޑުތައް އުފުއްލެވި ރަސްކަލާނގެ އެވެ. ދެން عرش ގެ މައްޗައް އެކަލާނގެ استواء ވެ ވޮޑިގަތެވެ. އަދި އިރާއި ހަނދު ޚިދުމަތްތެރި ކުރެއްވިއެވެ. (އެއިން) ކޮންމެއެއްޗެއް ކަނޑައެޅިގެންވާ މުއްދަތަކަށް ހިނގަ ހިނގާ ހުރެތެވެ. ހުރިހާ ކަމެއް އެކަލާނގެ ތަދުބީރު ކުރައްވަތެވެ. އާޔަތްތަށް ތަފްސީލް ކޮށްދެއްވަތެވެ. (އެއީ) ތިޔަބައިމީހުންގެ ވެރި ރސްކަލާނގެއާ ބައްދަލުވާނޭކަން ތިޔަބައިމީހުން ޔަގީން ކުރުމަށްޓަކައެވެ." އަދިވެސް އެކަލާނގެ ވަހީ ކުރައްވަނީ: " يُولِجُ اللَّيْلَ فِي النَّهَارِ وَيُولِجُ النَّهَارَ فِي اللَّيْلِ وَسَخَّرَ الشَّمْسَ وَالْقَمَرَ كُلٌّ يَجْرِي لِأَجَلٍ مُّسَمًّى ذَلِكُمُ اللَّهُ رَبُّكُمْ لَهُ الْمُلْكُ وَالَّذِينَ تَدْعُونَ مِن دُونِهِ مَا يَمْلِكُونَ مِن قِطْمِيرٍ " މާނައީ: " އެކަލާނގެ ދުވާލުގެ ތެރެއަށް ރޭގަނޑު ވައްދަވައި، އަދި ރޭގަނޑުގެ ތެރެއަށް ދުވާލު ވައްދަވައި، އަދި އިރާއި ހަނދު ޚިދުމަތްތެރި ކުރެއްވިއެވެ. (އެއިން) ކޮންމެ އެއްޗެއް ކަނޑައެޅިގެންވާ މުއްދަތަކަށް ހިނގަ ހިނގާ ހުރެއެވެ. އެއީ ﷲ އެވެ. (އެކަލާނގެއީ) ތިޔަބައިމީހުންގެ ވެރި ރަސްކަލާނގެއެވެ. ވެރިކަންވަނީ އެކަލާނގެއަށެވެ. އަދި އެކަލާނގެ ފިޔަވައި ތިޔަބައިމީހުން ގޮވައި އަޅުކަން ކުރާ ފަރާތްތަކަށް ކަދުރު އޮށެއްގެ ބޭރުގެ ދުލިފަށުގެ މިންވަރުވެސް މިލްކުވެގެން ނުވެއެވެ."
މީގެ އެތައް އަހަރެއް ކުރިން ބާވާލެއްވި ކީރިތި ޤުރުއާނުގައި މި ވާހަކަ ތައް އައިސްފައި ހުރުމުން އަހަރެމެންނަށް ދޭހަވަނީ މާތްﷲ ގެ ކުޅަދުން ވަންތަކަމެވެ.
މިއަދުގެ ސައިންސްވެރިން އިރު ހަލާކު ކުރެއްވުމާއި ބެހޭ ގޮތުން ބުނެފައިވާ ބަސްތަކަށް މިހާ ހިސާބުން ބަލާލާނަމެވެ. ބީބީސީ ނިއުސްގެ ސައިންސް ޑިޕާޓްމަންޓްއިން " ދަ ޑެތް އޮފް ދަ ސަން" މި ނަމުގައި ތައްޔާރު ކޮށްފައިވާ ރިޕޯޓެއްގައި ބުނެފައި ވަނީ " ކޮންމެވެސް ދުވަހަކުން އިރު ހަލާކު ވާނެއެވެ. އޭގެ ހޫނު ގަދަ ވެގެން ގޮސް އޭގެ އެންމެ އެތެރޭގައި ވާ ބައިކުދި ކުދިވެ ބުރައިގެން ދާނެއެވެ. މި އެތިކޮޅުތައް އުފެދިފައި ހުންނާނީ ކާބަން އާއި އޮކްސިޖަން އިންނެވެ."
ނެޝަނަލް ގިއޮގްރަފިކް ޗެނަލް އިން ހަމަ " ދަ ޑެތް އޮފް ދަ ސަން" މި ނަމުގައި ތައްޔާރު ކޮށްފައިވާ ޑޮކިޔުމެންޓްރީއެއްގައި ބުނެފައި ވަނީ " އަހަރެމެންގެ މި ޕްލެނެޓަށް ދިރުން ލިއްބައިދެނީ އިރުގެ ހަކަތައިންނެވެ. އެކަމަކު އިންސާނުންނެކޭ އެއްފަދައިން އިރަށް ވެސް ދިރުން ލިބިގެން ވަނީ ވަކި މުއްދަތަކަށެވެ. އަހަރެމެންގެ މި ދުނިޔެވެސް ގިނަދުވަސްވެގެން ގޮސް ދުނިޔޭގެ ހޫނު މައްޗައް ދިޔުމުގެ ސަބަބުން މި ދުނިޔޭގައިވާ ހުރިހާ ދިރުމެއް ނެތި ދާނެއެވެ. އަދި އިރު ވެސް ދުވަސް ވަމުން ދާވަރަކަށް އޭގެ ހޫނު މައްޗައް ދިއުމުގެ ސަބަބުން ދުނިޔޭގައިވާ ދިރުމަށް އޭގެ އަސަރު ކުރާނެއެވެ. އަދި އިރުގެ ސައިޒް ބޮޑުވެ ރަތް ކުލައިގެ ބޮޑު ތަރި އަކަށް ބަދަލުވާނެއެވެ. މި ކަމުގެ ސަބަބުން އިރާއި ކައިރީގައިވާ ޕްލެނެޓްތަކަކަށް މިކަމުގެ އަސަރު ކުރާނެއެވެ."
މިއީ ސައިންސްވެރިން އެމީހުންގެ ހޯދުން ތަކުން ހޯދާފައިވާ މައުލޫމާތެވެ. ހަމަ މި މައުލޫމާތުތައް މީގެ އެތައް ސަތޭކަ އަހަރެއް ކުރިން ބާވާލެއްވި ޤުރްއާނުގައި އައިސްފައި ހުރުން އެއީ ހަމަ ގައިމުވެސް ވިސްނާ ބަޔަކަށް ހުރި ހެކިތަކެކެވެ. ޤުރްއާނަކީ މުޢުޖިޒާތެއްކަން އަންގައިދޭ ދަލީލު ތަކެކެވެ. އަދި މާތް ﷲ ގެ ކުޅަދުން ވަންތަ ކުމުގެ ހެކިތަކެކެވެ.