އޭ ލޮބުވެތި މުސްލިމް ދިވެހި ދަރީންނޭވޭ!

އޭ ލޮބުވެތި މުސްލިމް ދިވެހި ދަރީންނޭވޭ! އެންމެ ފުރަތަމަ އިސްކުރަންވީ ތިބާގެ އިސްލާމް ކަމެވެ. ދެން އެއަށްފަހު ތިގެންނަ އެއްޗެއް ގެންނާށެވެ. އެކަމަކު އިސްލާމްކަމާއި ފުށުނާރުވައެވެ.

މުނާފިޤު ނުވާށެވެ. ހަނދާން ކުރާށެވެ. ތިބާ ވޯޓްދިނީ، މިތަނުގައި އިސްލާމްދީން ހިމާޔަތް ކުރާކަށް ނޫން ހެއްޔެވެ! ދެން މިހާރު ޕާޓީގެ ކުލުނާއި ލޯބި އިސްލާމްދީނަށް އޮތް ލޯތްބާއި ކުލުނަށްވުރެ ވަކި މަތިވީ ހެއްޔެވެ! ދީނަށް ޢަމަލުކުރުމުން މަތިވެރި އިލާހުގެ ހަޟްރަތުން ލިބޭނޭ މަތިވެރިކަމާއި ދަރުމައަށްވުރެ ޑިމޮކްރަސީގެ ވެރިން ދައްކާ ދެއުޅިއެއް ނުވާ ވާހަކަ ތަކަށް މާބޮޑަށް ހެއްލެވުނީ ހެއްޔެވެ!


އޭ ލޮބުވެތި މުސްލިމް ދިވެހި ދަރީންނޭވޭ! މިތަނުގައި މިވާ މަތިވެރި ދީން ވެއްޔާ މޮޑެވި، ކުޑަނަމަަވެސް ހުރި ރިވެތި އިޖްތިމާއީ ބަދަހި ކަމަކާއި، އަޚްލާޤީ މަތިވެރި ސިފައެއް ނައްތާލާފަދަ ލާދީނީ ކަންތައްތައް ޢާންމު ކުރަން މަސައްކަތް ކުރާފަދަ ޚަބަރުތައް އިވޭ އިރުވެސް ތިބާ ހަމަ އެކައްޗެކޭވެސް ނުބުނެ ތިހުންނަނީ ކީއްވެ ހެއްޔެވެ! އަދި ތިބާއަށް ކަމެއް ރޭކާލާ ވަރަށްވުރެ މިވެރިކަމުގެ ޢުމުރު ހަޤުވީމާ ހެއްޔެވެ! ނޫނީ ތިބާވެސް އަނގަ ހުޅުވާނީ ތިބާ ނުވަތަ ތިބާގެ ދަރީން ނުވަތަ ތިބާގެ އާއިލާގެ މެންބަރަކު އަލަށް ތަޢާރަފް ކުރާ ބުއިމަކުން ބޮއި އަވަދިވީމަ ހެއްޔެވެ! ނުވަތަ މަތިވެރިވެގެންވާ މިސްކިތް ދޫކޮށް އަލަށް އަޅާ ފައްޅިތަކުގެ ޚާދިމަކަށްވީމައި ހެއްޔެވެ!

އޭ ލޮބުވެތި މުސްލިމް ދިވެހި ދަރީންނޭވޭ! ތިބާ ހަނު ހުންނަން މަޖުބޫރު ކުރުވީ ޑިމޮކްރަސީ އާއި ބެހޭގޮތުން ތިބާއަށް އެނގިފައިވާ ފަތިވަރު ގިނަވީމާ ހެއްޔެވެ! ތިބާ މަޑުން ތިހުރީ، އިސްލާމްދީނުގެ އުސޫލުތަކަށް ފުރިހަމަޔަށް ޢަމަލު ކޮށްފިނަމަ ދިވެހިރާއްޖެ ބަނޑަށްޖެހިދާނެ ކަމަށް އެދައްކާ ވާހަކަ ޔަޤީން ކުރެވި ތިބާގެ ރައްބުގެ ކުޅަދުންވަތަކަމާއި މެދު ޝައްކު އުފެދިގެން ހެއްޔެވެ!

އޭ ލޮބުވެތި މުސްލިމް ދިވެހި ދަރީންނޭވޭ! ތިބާ ހަމަ އެކައްޗެކޭ ވެސް ނުބުނާނަން ހެއްޔެވެ! ތިބާގެ އަނގަ ހުޅުވާލާނީ ވާނެ އެއްޗެއްވާ ފަހުން ހެއްޔެވެ! މިވަގުތަކީ ތިބާގެ މުޅި ހަށިގަނޑާއި ޖާނާއި ފުރާނަ އިސްލާމްދީނުގެ ދިފާއުގައި ނެރެން އެންމެ އެކަށީގެންވާ ވަގުތުކަމަށް ތިބާ ޤަބޫލު ނުކުރަން ހެއްޔެވެ!

އޭ ލޮބުވެތި މުސްލިމް ދިވެހި ދަރީންނޭވޭ! ފުރިހަމަ ހޭވެރިކަމަކުން ހޭވެރިވާކަށް ނުވޭހެއްޔެވެ! ހޮޔޮވެރިކަމަކަށް މަގުފަހި ކުރުވުމަށް ތިބާގެ ނަފްސު ހޭލައްވާލާކަށް އަޅެފަހެ ނުވޭހެއްޔެވެ!

އަލްއަޚް ލަޠީފް