ވެބް ބްރައުޒާ: ފަޔާ ފޮކްސް

ތަޢާރަފް:
ފަޔާފޮކްސްގެ ތަޢާރަފްގައި މޮޒިއްލާ ކޯޕަރޭޝަނުން ބުނަނީ "އެއީ މޮޒިއްލާއިން ޑިވެލޮޕް ކުރާ، އަންނަން އޮތް ޖީލުތަކުގެ ވެބް ބަރައުޒާއެވެ. އަދި އެއީ އޯޕަންސޯސް ސޮފްޓްވެއާރ އެކެވެ.


" އަހަރެމެންވެސް ގަބޫލު ކުރާ ގޮތުގައި ފަޔާފޮކްސް އަކީ މިހާރު އެންމެ ހަލުއި ކަމާއި އެކީ ކުރިއަރަމުން އަންނަ ވެބް ބްރައުޒާއެވެ.
ތާރީޚް:
ފަޔާފޮކްސް އަކީ މޮޒިއްލާގެ ޕްރޮޖެކްޓެއްގެ ތެރެއިން އުފެދުނު ހިޔާލެކެވެ. އެންމެ ފުރަތަމަ މި ހިޔާލު ކުރީ މޮޒިއްލާގެ ދެ އިންޖިނޭރުން ކަމަށްވާ ޑޭވް ހަޔަޓް އަދި ބްލޭކް ރޮސް އެވެ. ސްޕޮންސާ ޝިޕެއްގެ ދަށުން ނެޓްސްކޭޕް ޑިވެލޮޕް ކުރަމުންއައި މޮޒިއްލާއިން 3 އޭޕްރިލް 2003 ގައި އެމީހުންގެ ޕްލޭން ބަދަލު ކުރާކަމުގެ އިއުލާންކޮށް ފަޔާފޮކްސް އާއި ތަންޑާރ ބާރޑް ޑިވެލޮޕްކުރަންފެށިއެވެ. ފަޔާފޮކްސްގެ އެންމެ ފުރަތަމަ ވާޝަންއަށް ދެވިފައިވާ ނަމަކީ ފަޔާފޮކްސްއެއް ނޫނެވެ. އެންމެ ފުރަތަމަ ނެރުނު ވާޝަންއަށް ދީފައިވާ ނަމަކީ "ފީނިކްސް"އެވެ. ނަމަވެސް 2003 ވަނަ އަހަރުގެ ތެރޭގައި މިނަން ފަޔާ ބާޑް އަށް ބަދަލު ކުރެވުނެވެ. އެއަށްފަހު އަހަރެމެން މިހާރު މި ބޭނުން ކުރާ ފަޔާފޮކްސް ގެ ނަމަށް ބަދަލުކޮއް ފަޔާފޮކްސްގެ ފުރަތަމަ އަދަދު ރިލީސް ކުރެވުނެވެ. އެއީ 1.5 ކެވެ. ފަޔާފޮކްސްގެ ފުރަތަމަ އަދަދު ރިލީސް ކުރެވުނީ 29 ނޮވެމްބަރ 2005 ގައެވެ. މިއަދާ ހަމައަށް އައި އިރު ފަޔާފޮކްސްގެ ވަރަށް ގިނަ އަދަދު ތަކެއް ނިކުމެފައިވާކަން ފާހަގަ ކުރެވެއެވެ. މިހާރު އަހަރެމެން މި ބޭނުން ކުރަނީ 3.5.5 ކެވެ. މި އަދަދު ރިލީސް ކުރެވުނީ 5 ނޮވެމްބަރ 2009 ގައެވެ.
ފަޔާފޮކްސްގައި ހިމެނޭ ފަސޭހަތައް:
ފަހަކަށް އައިސް ނިކުތް ގިނަ އަދަދު ތަކަކީ ބޭނުން ކުރާމީހުންނަށް ފަސޭހަކަމާއި އެކީ ބޭނުން ކުރެވޭނެހެން ތައްޔާރު ކުރެވިފައިވާ އަދަދު ތަކެކެވެ. މިގޮތުން ޓެބްޑް ބްރައުޒިން، ސްޕެލް ޗެކިން، ލައިވް ބްކްމާކް އަދި ޑައުންލޯޑް މެނޭޖާރ ފަދަ އެތައް ފަސޭހަތަކެއް ހިމެނެއެވެ. މީގެ އިތުރުން ތަފާތު ވައްތަރުގެ އެޑް އޮންތައް ހިމެނޭ ކަން ފާހަގަ ކޮއްލަމެވެ.
ސެކިޔުރިޓީ:
ފަޔާފޮކްސް ގައި ބޭނުން ކޮއްފައިވަނީ ސޭންޑް ބޮކްސް ސެކިޔުރިޓީ މޮޑެލް އެކެވެ. މީގެ ސަބަބުން ތަފާތު ވައްތަރުގެ ބަގް ތަކުން ސަލާމަތްކޮއްދެއެވެ. ދުނިޔޭގެ ގިނަ ބަޔަކު ގަބޫލު ކުރާގޮތުގައި ސެކިޔުރިޓީގެ ގޮތުން އެންމެ ރަނގަޅީ ފަޔާފޮކްސްއެވެ.
ބްރައުޒާ މާކެޓްގައި ފަޔާފޮކްސް:
މިއަހަރުގެ އޮކްޓޯބަރ މަހުގެ ނިޔަލަށް ބްރައުޒާ މާކެޓްގައި ފަޔާފޮކްސް ހިއްސާކުރަނީ 43 ޕަސެންޓެވެ. މިއީ މައިކްރޯސޮފްޓް އިންޓަރނެޓް އެކްސްޕްލޯރާއަށް ފަހު އެންމެ ބޮޑު އަދަދެވެ. އިންޓަރނެޓް އެކްސްޕްލޯރާ ހިއްސާކުރަނީ 52 ޕަސެންޓެވެ. މިދާ ބާރުމިނުގައި ފަޔާފޮކްސް ކުރި އަރައިގެން ދާނަމަ ބަރައުޒާ މާކެޓްގެ އެއްވަނަ ހޯދުމަކީ ދާދި ގާތުގާ ވާކަމެކެވެ.
ފަޔާފޮކްސް ހިންގެނީ ކޮން އޮޕަރޭޓިން ސިސްޓަމްތަކެއްގައި؟
ޖުމްލަކޮށް ބަލާއިރު ހުރިހާ މަޝްހޫރު އޮޕަރޭޓިން ސިސްޓަމްތަކެއްގައިވެސް ފަޔާފޮކްސް ހިންގެއެވެ. މިގޮތުން މައިކްރޯސޮފްޓް ވިންޑޯޒް، މެކް އޯއެސް އެކްސް އަދި ލިނަކްސް ހިމެނެއެވެ.
ލިބިފައިވާ ކާމިޔާބީ ތަކާއި އެވޯޑްތައް:
މިހާތަނަށް އައި އިރު ފަޔާފޮކްސް ވަނީ ވަރަށް ގިނަގުނަ ކާމިޔާބީތައް ހާސިލްކޮއްފައެވެ. މި ގޮތުން ލިބިފައިވާ ބައެއްކާމިޔާބީތައް މިތާގައި ހިމަނާލާނަމެވެ. ޕީސީ މެގަޒިންގެ އެޑިޓާރސް ޗޮއިސް އެވޯޑް 2005، 2006 އަދި 2008 ގައި ހޯދާފައިވެއެވެ. ސީނެޓް އެޑިޓާރސް ޗޮއިސް އެވޯޑް 2005، 2006، އަދި 2008 ގައި ހޯދާފައިވާއިރު، ސޮފްޓް ޕީޑިޔާގެ ޔޫސާސް ޗޮއިސް އެވޯޑް 2005 ގައި ހޯދާފައިވެއެވެ. އަދި މީގެ އިތުރުންވެސް ތަފާތު ގިނަ އެވޯޑްތައް ހޯދާފައިވާކަން ފާހަގަ ކޮއްލަމެވެ.
ނިންމާލަމުން:
ނިންމާލަމުންވެސް ބުނެވޭނީ ހަމަ ފެށުމުގައިވެސް ބުނި ފަދައިންނެވެ. އަޅުގަޑުގެވެސް އުންމީދަކީ މޮޒިއްލާ ކުންފުނިންވެސް ކުރާ އުންމީދެވެ. މުސްތަގުބަލްގެ ވެބް ބްރައުޒާގެ ގޮތުގައި ފަޔާފޮކްސް ވެގެންދިއުމެވެ. އަދި އަހަރެމެން ދިވެހިންގެ މެދުގައި ފަޔާފޮކްސް މަގުބޫލު ބްރައުޒާއެއްގެ ގޮތުގައިވުމެވެ. ފަޔާފޮކްސްއަށް އަބަދުވެސް ކާމިޔާބީދެއްވުމެވެ.

ޕޯސްޓް ކުރީ dhi-burunu ތާރީޚް Wednesday, November 18, 2009. މިލިޔުން ހިމެމެނޭނީ ޓެކްނޮލޮޖީ . ވިދާޅުވަމުން ތިޔަ ގެންދަވާ ލިޔުމަށް އިސްތިރާކު ކުރައްވާ! އާރު.އެސް.އެސް..