އެންމެ ފަހުގެ

Thursday, October 29, 2009 | Posted by ބުރުނު

ދުނިޔެ ދުށް އެންމެ ފުރަތަމަ ދެރިކޯޑު ދިވެހި ރާއްޖޭގައި



ޙުސައިން ރަޝީދު އަޙްމަދު
ދުނިޔޭގެ ތާރީޚަކީ އަބަދުހެން ކުލަ ބަދަލުކުރަމުން އަންނަ އެއްޗެކެވެ. ޞަފްޙާ އައުކުރުމަކީ ދުނިޔޭގެ އާދައެކެވެ. ރާއްޖޭގެ ތާރީޚަށް ވެސް ގެނައީ އެކަހަލަ ކުލައެކެވެ. ބައެއް ފަހަރު މިހެން ދިމާވަނީ ތާރީޚުގެ ޞަފްޙާއަށް އަރާ މީހެއްގެ ސަބަބުންނެވެ.

ރާއްޖޭގެ ފުރަތަމަ ރައީސުލްޖުމްހޫރިއްޔާއެވެ. އަލްއަމީރު އަލްމަރްޙޫމު މުޙައްމަދު އަމީނު ދީދީއެވެ. އޭނާ ރާއްޖެއަށް ވަރަށް ގިނަގުނަ ޚިދުމަތްތަކެއް ކޮށްދެއްވަން އުޅުއްވި ވާހަކަ އަޅުގަނޑު އަޑު އަހަމެވެ. ބައެއް ފަތްފުށްތަކުން ފެނިފައިވެސް ވެއެވެ. ރާއްޖެއަށް އައި ފުރަތަމަ ޖުމްހޫރިއްޔާގެ ފުރަތަމަ ރައީސެވެ. ރައްޔިތުންގެ ތެރޭން ބަޔަކު އޭނާގެ ސިޔާސަތު ކަމުނުގޮސްގެން ވައްޓާލީއެވެ. ބަޣާވަތްކުރީއެވެ. އަނިޔާކޮށް މަރާލީއެވެ. އެކަމުގެ އަޑީގައި ތިބީ ވެރިކަމަށް ދެން އަރަން ތިބި މީހުންނޭވެސް ބަޔަކުމީހުން ބުނާތީ އިވެއެވެ.


ފުރަތަމަ ޖުމްހޫރިއްޔާ އުވާލެވުނެވެ. އެވެރިކަމުގެ ރައީސް އަވަހާރަވިއެވެ. ވަރަށް އަނިޔާވެރި ގޮތެއްގައެވެ. ދުވަސްތަކެއް ފަހުން ދެވަނަ ޖުމްހޫރިއްޔާއެއް އުފަންވިއެވެ. މުޅިން ސިޔާސަތު ބަދަލުވިއެވެ. ވެލާނާގޭ އަލްއަމީރު އިބްރާހީމް ނާޞިރެވެ. ކޭސީއެމްޖީގެ ލަޤަބުވެސް ހޯއްދެވިއެވެ. ޤައުމު ބޭރުގެ އަޅުވެތިކަމުން މިނިވަންކުރެއްވިއެވެ. ވޯރާއިންގެ އަތްދަށުން ސަލާމަތްކުރެއްވިއެވެ. ތަޢުލީމަށް އާބަދަލެއް ގެންނެވިއެވެ. މަނާވެފައި އޮތް ދަތުރުފަތުރު ރައްޔިތުންނަށް ހުޅުވާލަ ދެއްވައި ރައްޔިތުން މިނިވަންކުރެއްވިއެވެ.
ދެވަނަ ޖުމްހޫރިއްޔަތުގެ ކުރި ބަދަލުވެ، ދެވަނަ ރައީސަކު ވަޑައިގަތެވެ. ދީނީ ޢިލްމުވެރިއަކު އެންމެ ފުރަތަމަ ފަހަރަށް ރާއްޖޭގެ އެންމެ އިސް ވެރިކަމަށް ވަޑައިގަތީއެވެ. ރައްޔިތުންގެ ވަރަށް ފޮނި އުއްމީދު ތަކަކާއެކުގައެވެ. ނަމަވެސް ރާއްޖޭގެ ފަޟާއިން ފެނިގެން ދިޔައީ ރައްޔިތުން އުއްމީދު ކުޅަ ފޮނި އުއްމީދެއްނޫނެވެ. ކުރީގެ ރައީސަށް ބަދުބަސް ބުނެ ރަސްމީކޮށް މުޒާހަރާކޮށް، ކާޓޫނު ކުރަހައި، ހުތުރު އެއްޗެހި ގޮވައި، ގޮވަތިގެދޮރު ނަގައި، ދަރިންތައް މަގުމަތިކުރީއެވެ. މުދާކޮޅު ނީލަންކީއެވެ. ސަރުކާރަށް މިލްކިއްޔާތު ނެގީއެވެ.
ދެވަނަ ރައީސް ދިގުވެރިކަމަކަށް އަރައިވަޑައިގަތެވެ. އަލްއުސްތާޛު މައުމޫނު ޢަބްދުލްޤައްޔޫމެވެ. މާއަވަހަށް މިއީ ރައްޔިތުންގެ ވެރިކަމެއް ކަމަށް ހަނދުމަ ނަތްތާލެއްވީއެވެ. އަނިޔާތަށް ހައްދުފަހަނަޅާ ދިޔައީއެވެ. މިކަމުގައި މާދުރުން ހެކިހޯދާކަށް އަޅުގަނޑަށް ނުޖެހޭނެއެވެ. އަޅުގަނޑާ އަޅުގަނޑުގެ ޢާއިލާއަކީ އެވެރިކަމުގެ އަނިޔާ އެންމެ ބޮޑަށް ބަރްދާޝްތު ކުރި އެއް ޢާއިލާކަމަށް ވީތީއެވެ.
މާސިންގާ ދިގުވެރިކަމަކަށްފަހު ރައްޔިތުން ފޫހިވެ މާޔޫސް ވުމުންވެސް އަމިއްލަފުޅަށް ދޫކޮށްލުމަކަށް އެއްބަސްވެ ވަޑައިނުގަތެވެ. ް އަނިޔާވެރިކަމުން މިންޖުވުމަށާއި، މިނިވަންކަން ހޯދަމުން އެކިގޮތްގޮތަށް ރައްޔިތުނ މަސައްކަތްކުރަމުން ދިޔައެވެ. އެންމެފަހުން ގަދަކަމުން ކަހަލަ ގޮތަކަށް ރައްޔިތުންގެ މިނިވަން ވޯޓަކުން ރައްޔިތުން މައުމޫނު ވެރިކަމުން ދުރުކޮށްލައިފިއެވެ. މިމިނިވަންކަން ހޯދަން ރައްޔިތުން ކުރި މިއްނެތް މަސައްކަތުގެ ބޮޑުކަމުން މިކުޑަކުޑަ ރާއްޖެއަށް މުޅި ދުނިޔޭގެ ކަޅި އޮތީ ހުއްޓިފައެވެ. އެންމެފަހުން ރައްޔިތުންނަށް މިނިވަންކަން ލިބުނީއެވެ.
އާޤާނޫނު އަސާސީއެއް ހެދުނީއެވެ. ރައްޔިތުންގެ ޙައްޤުތަކެއް ކަނޑައެޅި ބަޔާންކުރެވުނީއެވެ. ޑިމޮކްރަސީއެއްގެ މާސިންގާ ކަނޑަކަށް ގޮސް ޤައުމު ވެއްޓުނީއެވެ. އެކަމަކު ޑިމޮކްރަސީ ރާއްޖެއަށް މިއައީ އެއަށް ޤައުމު ތަޞައްރަފު ފުދެނެއް ނޫންކަން ޤައުމުގެ ޙާލުގެ ދުލުން އެބަ ބުނެއެވެ. އެއީ ނުދޭންއުޅޭ އެއްޗެއް ގަދަކަމުން ހޯދީމާ ވާގޮތްކަންވެސް ނޭގެއެވެ.
ދިގު ސަރުކާރު ވައްޓައިލެވިއްޖެއެވެ. ވަރަށް އުނދަގުލުންނެވެ. އެކަމަކު މިހާރު ވެއްޓުނު ސަރުކާރުގެ މުގޫ ބައްޔެއްނޫނެވެ. އެކިނަންނަމުގައި އެސަރުކާރު އަދި ދެމި އޮބައޮތެވެ. އާ ސަރުކާރު އައިއިރު، ޤައުމަށް އޮތީ ވަރަށް ބޮޑު ލޮޅުންތަކެއް އަރާފައެވެ. ބަދަލުވަމުން އައި އެހެން ސަރުކާރުތަކާ ޚިލާފަށް މިސަރުކާރަށް ޖެހުނީ ބޮޑެތި ދަރަނިތައް ބޮލުގައި އަޅާށެވެ. ފޭލްކޮށްފައިއޮތް އިޤްތިޞާދަކާ ބަގުޑި ބައްދާށެވެ. ހުސްވެފައިއޮތް ދެއަތްނަގާ އުނގަށްލާށެވެ. އަނެއްކޮޅުން ކުރީގެ ރައީސާއި އޭނާގެ އަޢުވާނުންގެ ޖައްބާރުކަމާއި އުނދަގޫތަކާ ފިސާރިއަކަށް ކުރިމަތިލާށެވެ. ރައްޔިތުންގެ ތެރެއިން މިމީހުންނަށް ހެއްލި، ގެއްލިފައިތިބި މީހުންގެ ދަތިކުރުންތަކާއި ގޮންޖެހުންތައް މޭފުޅާކޮށްގެން ދިފާޢުކުރާށެވެ.
މިއީ ރައީސް ނަޝީދެވެ. ބަލަންޖެހޭނީ ރައީސް ނަޝީދުގެ ހީވާގި ކަމެއްގެ މިންވަރަކަށެވެ. ކެތްތެރިކަމަކަށެވެ. ހުންގާނުގައި ހިއްޕަވާލައްވާފައިހުރި ބާރުމިނަކަށެވެ. ގޮންޖެހުންތަކަށް ރައްދުދެއްވައި، ދިފާޢުކުރައްވާގޮތެއްގެ ހަލުއިކަމަށެވެ. ޙަސަދަވެރިން މިހާރު ގިނައެވެ. ޢަދުއްވުން ތިބީ ފާޅުގައެވެ. ވެރިކަން ވައްޓާލުމުގެ ފޮނި އުއްމީދުގައެވެ. ބޮޑު ޢަޒުމުގައެވެ.
ނަޝީދުގެ އުކުޅުތައް ކުޑައެއް ނޫނެވެ. އިދިކޮޅު މީހުންގެ ކޮންމެ ވާރަކުން ރެކިގެން ވަޑައިގަންނަވަނީ ޙަސަދަވެރިންގެ ޙަސަދަވެރިކަން އިތުރުވާ މިންވަރަށެވެ. މިހާރު ތިމާވެއްޓޭ ވިދާޅުވެ ކަނޑުގެ އަޑިއަށް ވެސް ވަޑައިގެން ޖަލްސާވެސް ބޭއްވެވީއެވެ. މުޅިދުނިޔޭގެ އެންމެ ފުރަތަމަ ޖަލްސާއަކަށް އެޖަލްސާ ވެގެންދިޔައީއެވެ. ރައީސް ނަޝީދުގެ ރިޔާސަތުގައެވެ. އަދި އެވަރުން ފުއްދާލެވުނީއެއްވެސް ނޫނެވެ. ދުނިޔޭގެ އެންމެ ފުރަތަމަ ދީނީ ދަރުސެއް ކަނޑު އަޑީގައި ދެވުނީ ވެސް ނަޝީދުގެ ދައުރުގައެވެ. ޑރ. ޢަބްދުލްމަޖީދު ޢަބްދުލްބާރީގެ ބަސްފުޅުންނާއި އަޑުފުޅުންނެވެ. އެޝަރަފު ނުލިބުނީތީ މަވެސް...އާހް..... ހަމަ ދެރަވިއެވެ. ޙަސަދަވެރިވެސް ވިއެވެ. އެކަމަކުވެސް.....އެއީ ދުނިޔެދުށް އެންމެ ފުރަތަމަ......ކަމެވެ. ޤަބޫލުކުރަށްވާށެވެ! އެއްބަސްވެ ވަޑައިގަންނަވާށެވެ! އަހަރެމެންނަށް ނުދެވުނީ ހަމަ ތަޤްދީރުގައި ނެތީތީއެވެ. މިއިންވެސް ލިބިގަންނަންވީ ޢިބުރަތެކެވެ. ފިލާވަޅެކެވެ.
ނިންމާލަމުންވެސް ބުނަން އޮތީ ދުނިޔެ ދުށް އެންމެ ފުރަތަމަ ދެކަމެއް ރާއްޖޭގައި މިއޮތީ ހިނގާފައެވެ. އެންމެ ފުރަތަމަ ކަނޑުއަޑީގައި ކެނބިނެޓް ޖަލްސާއެއް ބޭއްވުމެވެ. އެންމެ ފުރަތަމަ ކަނޑުއަޑީގައި ދީނީ ދަރުސެއް ދިނުމެވެ. ވަގުތުން މުޅިދުނިއަށް އެއަޑާއި މަންޒަރު ދައްކުވައިދިނުމެވެ. މިއީ ހިތް ޤަބޫލު ކުރިއަސް ނުކުރިއަސް ހަމަ ޙަޤީޤަތެވެ. ވީކަމެކެވެ. ޤަބޫލުކުރަންޖެހޭ ކަމެކެވެ. ބައެއް މީހުންނަށް ޤަބޫލުކުރަން ދަތިވާނެކަންވެސް އަޅުގަނޑު ދެނަހަރީމެވެ. ރައީސް މައުމޫނުވެސް ވަނީ ހަމަ ރެކޯޑެއް މުގުރާލައްވާފައެވެ. ރާއްޖޭގައި އެންމެ ފުރަތަމަ ދީނީ ޢިލްމުވެރިއަކު ރައީސްކަމަށް ވަޑައިގަތުމުގެ ޝަރަފެވެ. މިތިން ރެކޯޑުގެ ފައިދާއާއި ނަތީޖާއަށް ފައިސަލާކުރެއްވުމަށް ދިވެހި ރައްޔިތުންނަށް އަޅުގަނޑު ދޫކޮށްލާނަމެވެ.

ޕޯސްޓް ކުރީ ބުރުނު ތާރީޚް Thursday, October 29, 2009. މިލިޔުން ހިމެމެނޭނީ . ވިދާޅުވަމުން ތިޔަ ގެންދަވާ ލިޔުމަށް އިސްތިރާކު ކުރައްވާ! އާރު.އެސް.އެސް..

0 ޚިޔާލު ލިބިފައިވޭ "ދުނިޔެ ދުށް އެންމެ ފުރަތަމަ ދެރިކޯޑު ދިވެހި ރާއްޖޭގައި"

   

މިލިޔުމަށް ހިޔާލު ފާޅު ކުރައްވާ!

Blog Archive

އެންމެ ފަހުގެ ހިޔާލުތައް

އެންމެ ފަހުގެ ލިޔުންތައް