މުސްލިމް އަންހެން ދަރިއެއްގެ ފަރާތުން ޔަހޫދީ މަންމައާއި ބައްޕައަށް ސިޓީއެއް.( ދެވަނަބައި)

އަހަރެން ކުރިއަށްވުރެބޮޑަށް މުސްލިމުންނާއި އޮންނަ ގުޅުން ވަރުގަދަކުރީމެވެ.އެމީހުންގެ ފަރާތުން އަހަންނަށް އޯގަތެރިކަމާއި އަޅާލުން ލިބުނެވެ. އެމީހުން އަހަރެންނަށް އިސްލާމްދީނާއި ބެހޭ ސާފު، ތެދު މައުލޫމާތު ފޯރުކޮށްދިނެވެ.

އިސްލާމް ދީނަކީ އަހަރެމެން އިންސާނުންގެ ހައްގުތައް އެންމެ ފުރިހަމައަށް ރައްކާތެރިކޮށްދޭ ދީނެވެ. އެ ދީނުގައި އަހަރެމެން އުޅެންވީގޮތާއި އުޅެގެން ނުވާނޭ ގޮތްތައް ވަނީ ކަނޑައަޅާފައެވެ.

ޒިނޭ ކުރުމާ، ވައްކަންކުރުމާ، ފޭރުމާ އަދި މަސްތުވުން ފަދަ ކަންނަމަކީ އިސްލާމްދީން މަނާކުރާ ކަންތައްތަކެވެ. މަންމަ އާއި ބައްޕަ ކައިރީ ކުރިންވެސް އަހަރެން ބުނި ފަދައިން އަހަރެންގެ ކުރީގެ ރައްޓެހިންނަކީ މިފަދަ ގޯސް ކަންތައްތައްކުރާ ބައެކެވެ. އަހަރެން އެމީހުންނާ ވަކިވީ އެފަދަ ގޮތަކަށް އުޅެން އަހަރެން ބޭނުން ނުވާތީއެވެ. އަދި އިސްލާމް ދީން އިހުތިޔާރު ކުރީ އެދީނުގެ ސަބަބުން އެފަދަ ގޯސްކަންތައްތަކާ ދުރަށް ދިއުމަށް ފަސޭހަތަކެއްވާތީއެވެ. އަދި ޝައިތާނާގެ ބަހަށް ހެއްލެން ބޭނުން ނުވާތީއެވެ.

އޭ ލޯބިވާ މަންމަ އާއި ބައްޕާއެވެ.

އަހަރެން ބޭނުންވީ ސުންނީ މުސްލިމަކަށް ވާށެވެ. މިގޮތުން 2006 ވަނަ އަހަރުގެ ކުރީކޮޅު ނިޔުޔޯކުގައި ހުރި މުސްލިމުންގެ މިސްކިތަކަށް އަހަރެން ދިޔައީމެވެ. އެތަނުގައި ތިބި ދީނީ އިލުމުވެރިންގެ ކިބައިން އަހަރެން ބޭނުންވާ ސުވާލު ތަކުގެ ޖަވާބު ހޯދީމެވެ. އަދި އަހަރެންނަށް ވިސްނުނީ މި އީ އަހަރެންގެ އިސްލާމް ކަން ހާމަ ކުރުމަށް އެންމެ ރަނގަޅު ވަގުތުކަމުގައެވެ. އެހެންވެ އެމީހުން ކައިރީ އެދިގެން އޭގެ ދެ ހަފްތާ ފަހުން އެ މިސްކިތުގެ އިމާމް އަދި 80 އާއި 100 އާއި ދެމެދުގެ މުސްލިމުންގެ ކުރިމަތީގައި ޝަހާދަތްކިޔާ އަހަރެން އިސްލާމް ވީމެވެ. އެއީ އަހަރެންގެ ހަޔާތުގައި އައި އެންމެ އުފާވެރި ވަގުތުކޮޅެވެ. މިސްކިތުގައި ތިބި އެންމެހާ މީސްތަކުން އަހަރެންނަށް މަރުހަބާކިޔެވެ. އެވަގުތު އަހަރެންނަށް ކުރެވެމުން ދިޔަ އިހްސާސްތަކަކީ ބަޔާން ކުރަން އުނދަގޫ އިހްސާސްތަކެކެވެ. އަހަރެންނަށް އިހްސާސް ކުރެވެމުން ދިޔައީ އަހަރެންނަށް ކަންތައް މި ކުރެވުނީ އެންމެ ރަނގަޅަށް ކަމުގައެވެ. ނަމަވެސް އަހަރެން އިސްލާމްދީން ގަބޫލު ކުރުމުން ދިމާވާނެ މައްސަލަތަކެއް ހުންނާނެކަން އަހަރެންނަށް އިނގެއެވެ. އެއީ އަހަރެން އެންމެ ލޯބިވާ މީހުން ކަމުގައިވާ މަންމައާއި ބައްޕަ އެކަން ބަލައި ނުގަންނާނެކަމެވެ.

އެކަންކަމާ ދޭތެރޭ ވިސްނާލުމުން އަހަރެންގެ ހިތަށް ވަރަށް އަސަރު ކުރެއެވެ. އަދި ދެރަވެސް ވެއެވެ. އަހަރެންނަކީ މަންމަ މެންގެ ދަރިއަކަށް ވީތީ ދެރަގޮތެއްވާކަށް ނޭދޭނެ ކަންވެސް އެނގެއެވެ. ނަމަވެސް މަންމަ އާއި ބައްޕައަށް ބުނެލަން ބޭނުން ވަނީ އަހަރެން އަހަރެންގެ ހަޔާތުގައި އިހުތިޔާރު ކުރި މަގަކީ ހަމަ އެންމެ ރަނގަޅު މަގު ކަމުގައެވެ. އަދި އަހަރެން މިކަން މި ކުރީ އަހަރެންގެ އަމިއްލަ އިހުތިޔާރުގައެވެ. އެއްވެސް މަޖުބޫރު ކަމެއް ނެތިއެވެ.

ލޯބިވާ މަންމައާއި ބައްޕާއެވެ!

އަހަރެންނަކީ މިއަދު އިސްލާމެކެވެ. އަހަރެން ﷲ ވޮޑިގެންވާކަން ގަބޫލު ކުރަމެވެ. އިސްލާމްދީނާއި ކްރިސްޓިއަންދީނާއި ހުރި އެންމެ ބޮޑު ތަފާތަކީ އީސާގެފާނަކީ ﷲ ދަރި އެއްކަން މުސްލިމުން ނުވަތަ އިސްލާމްދީން ގަބޫލު ނުކުރުމެވެ. ނަމަވެސް އަހަރެމެން މުސްލިމުން ގަބޫލު ކުރަނީ އީސާގެ ފާނަކީ ﷲގެ ރަސޫލެއްކަމެވެ. ކްރިސްޓިއަނުން ގަބޫލު ކުރަނީ އީސާގެ ފާނަކީ ﷲގެ ދަރިއެއްކަމަށެވެ. ކީރިތި ގުރުއާނުގައިވެސް ރަސޫލުންގެ ވާހަކަ ބަޔާންކޮށްދެއްވާފައި ވެއެވެ. ހުރިހާ ރަސޫލުންނަކާއި ނަބިޔުންނެއް ފޮނުއްވުނީ މާތް ﷲގެ ދީނައިގެންގެވެ. އެދީން މީސްތަކުންނަށް އޮޅުން ފިލުވައިދެއްވުމަށެވެ. ނަމަވެސް ކޮންމެ ރަސޫލަކުވެސް ފޮނުއްވުނީ އެބޭކަލެއްގެ ގައުމަށެވެ. މުހައްމަދު ( ސައްލަﷲ އަލައި ވަސައްލަމް) ފިޔަވައެވެ. އެކަލޭގެފާނު ފޮނުއްވުނީ މުޅި އުންމަތަށެވެ. އެއީ އެންމެ ފަހުގެ ރަސޫލާއެވެ.

އަހަރެންގެ މި ބަސްތައް ގަބޫލު ކުރަން މަންމަ މެންނަށް ފަހަރުގައި އުނދަގޫ ވެދާނެއެވެ. ނަމަވެސް މިކަންތައް ސާބިތު ކޮށްދިނުމަށް މިއަށްވުރެބޮޑަށް ކުރެވޭނެ ކަމެއް ނެތެވެ. އަހަރެން އިސްލާމް ދީން ގަބޫލުރަން ދިމާވި ކަންތައްތައް މި ކިޔައި ދެވުނީއެވެ.

ލޯބިވާ މަންމަ އާއި ބައްޕާއެވެ. އަހަރެން ތިޔައިގެ ދެމީހުން ދެކެ ނުހަނު ލޯބިވަމެވެ. އަހަރެންގެ ހަޔާތުގައި އެންމެ މުހިންމު ބަޔަކީ ތިޔައީކަން އަހަރެން ދުވަހަކުވެސް ހަނދާން ނުނެތޭނެއެވެ. އަދި މި ގުޅުން ދުވަހަކުވެސް ކަނޑާލާކަށް އަހަރެން ބޭނުމެއް ނޫނެވެ. މަންމަ އާއި ބައްޕާއެވެ. އަހަރެމެންގެ ހުރި ހަމަ އެކަނި ފަރަގަކީ އަހަރެން ގަބޫލު ކުރާ ގަބޫލު ކުރުމެވެ. އަހަރެންގެ އަގީދާއެވެ. އަހަރެންނަކީ އިސްލާމަކަށް ވީކަމެވެ. އިސްލާމްދީން ގަބޫލު ކުރުމެވެ.

މަންމަ އާއި ބައްޕަ ދެކެ އަބަދުވެސް ލޯބިވާ ދަރިފުޅު.

................

= ނިމުނި=

ޕޯސްޓް ކުރީ dhi-burunu ތާރީޚް Wednesday, February 17, 2010. މިލިޔުން ހިމެމެނޭނީ ދީން . ވިދާޅުވަމުން ތިޔަ ގެންދަވާ ލިޔުމަށް އިސްތިރާކު ކުރައްވާ! އާރު.އެސް.އެސް..