2009 ވަނަ އަހަރު އިންޓަރނެޓް ބޭނުން ކުރެވިފައިވާ ގޮތަށް ބަލައިލުމެއް.

ޕަބްލިޝް ކުރީ: އެޑްމިން
ލިޔުނީ:ދި-ބުރުނު

އިންޓަރނެޓްގެ ސަބަބުން އަހަރެމެން މުއާސަލާތު ކުރާގޮތް މިއަދު މިވަނީ ވަރަށް ބޮޑުތަން ބަދަލު ވެފައެވެ. ކޮންމެ ދުވަހަކު އެތައްބަޔަކާ ބައްދަލުވެ ، އެމީހުންގެ ވާހަކަތައް އަހަރެމެންނާ ހިއްސާކޮށް، އަދި އަހަރެމެންގެ ވާހަކަތައް އެމީހުންނާ ހިއްސާކުރުމުގައި އިންޓަނެޓް ވަރަށް މުހިންމު ދައުރެއް އަދާކުރެއެވެ. އެހެން ކަމުން އުފެދޭ ސުވާލަކީ 2009 ވަނަ އަހަރު އިންޓަރނެޓް ބޭނުން ކުރެވިފައިވަނީ ކޮންގޮތަކަށް ބާވައެވެ؟


މި ސުވާލުގެ ޖަވާބު ވަރަށް ފުރިހަމަ ގޮތެއްގައި ޕިންގްޑޮމް ޑޮޓް ކޮމް އިންވަނީ ހާމަ ކޮށްފައެވެ. މި ތަފާސް ހިސާބުތަކަށް ބަލައިލުމުން ހައިރާންވާ ކަހަލަ ކަންތައް ތަކެއް ފެނިގެން ދެއެވެ. މިތާ މި ހިމަނާލަނީ މީގެ ތެރެއިން ބައެއް ހިސާބު ތަކެވެ.
* 2009 ވަނަ އަހަރު 90 ޓްރިލިއަން އީމެއިލް ފޮނުވާފައިވެއެވެ. އެއީ ދުވާލަކަށް 247 ބިލިޔަން މެއިލްއެވެ.
* 47 މިލިޔަން ވެބް ސައިޓް 2009 ވަނަ އަހަރު ހުޅުވާފައި ވެއެވެ. މި އަދަދާ އެކީ ވެބްސައިޓް ތަކުގެ މުޅި ޖުމުލަ 234 މިލިޔަނަށް އެރީއެވެ.
* 2009 ގެ ސެޕްޓެމްބަރ މަހާއި ހަމައަށް އިންޓަރނެޓް ބޭނުން ކުރި މީހުންގެ އަދަދަކީ 1.73 ބިލިޔަން މީހުންނެވެ. އެންމެ ގިނަ އަދަދަކަށް އިންޓަރ ނެޓް ބޭނުން ކުރާމީހުން އުޅޭނީ އޭސިޔާގައެވެ. އެއަށް ފަހު ޔޫރަޕް އަދި ނޯތު އެމެރިކާއެވެ.
* 2009 ވަނަ އަހަރު 126 މިލިޔަން ބްލޮގް ހުޅުވާފައި ވެއެވެ.
* 2009 ވަނަ އަހަރު ދުވާލެއްގެ މައްޗަށް 27.3 މިލިޔަން ފަހަރު ޓްވީޓް ކޮށްފައިވެއެވެ.
* 2009 ވަނަ އަހަރު ނިމުނު އިރު ފޭސްބުކް ބޭނުން ކުރާ މީހުންގެ އަދަދަކީ 350 މިލިޔަނެވެ.
* 4 ބިލިޔަން ފޮޓޯ ފްލިކާ އަށް އަޕްލޯޑް ކޮށްފައިވާއިރު، މަހެއްގެ މައްޗަށް 2.5 ބިލިޔަން ފޮޓޯ ފޭސްބުކަށް އަޕްލޯޑް ކުރެވެއެވެ.
* ދުވާލެއްގެ މައްޗަށް 1 ބިލިޔަން ވީޑިޔޯ ޔޫޓިޔުބް މެދުވެރިކޮށް ބަލާކަމަށް ވެއެވެ.
* ބްރައުޒާ މާކެޓްގެ 62 ޕަސެންޓް އިންޓަރނެޓް އެކްސް ޕްލޯރާ ހިއްސާ ކުރާއިރު، އޭގެ ފަހަތުން ވާދަ ކުރަނީ ފަޔާފޮކްސް، ގޫގުލް ކްރޯމް އަދި ސަފާރީއެވެ.
މި ހިމަނާލެވުނީ އޭގެ ތެރެއިންން ބައެއް ހިސާބުތަކެވެ. ހައިރާން ވާކަހަލަ ކަންތައްތަކެއް ފާހަގަ ކުރެވޭ ނޫންތޯއެވެ. 2010 ވަނަ އަހަރުގެ ހިސާބުތައް މިއަށްވުރެވެސް ހައިރާން ވާނެ ކަމަށް ލަފާކުރެވެއެވެ.
މި ލިޔުން ނިންމާލަމުން ތިޔަ އެންމެހާ ކިޔުން ތެރިންނާ ދެތިން ސުވާލެއް ކޮށްލާނަމެވެ. ތިޔަބޭފުޅުން އިންޓަރނެޓް ގެ ބޭނުން ކުރަނީ ކޮން ގޮތަކަށްތޯއެވެ؟ އަދި ކިހާ ވަގުތެއް އިންޓަރނެޓުގައި ހޭދަ ކުރަން ތޯއެވެ؟

ޕޯސްޓް ކުރީ dhi-burunu ތާރީޚް Wednesday, February 03, 2010. މިލިޔުން ހިމެމެނޭނީ ޓެކްނޮލޮޖީ . ވިދާޅުވަމުން ތިޔަ ގެންދަވާ ލިޔުމަށް އިސްތިރާކު ކުރައްވާ! އާރު.އެސް.އެސް..