ސާފް ޗެމްޕިއަންޝިޕް މިއަދު ޑާކާގައި

ދެކުނު އޭޝިއާގެ ޤައުމުތަކުގެ މެދުގައި ކުޅެވޭ އެންމެ ބޮޑު ފުޓްބޯޅަ މުބާރާތް "ސާފް ޗެމްޕިއަންޝިޕް" މިއަދު ބަންގްލަދޭޝަގެ ވެރިރަށް ޑާކާގައި ފެށޭނެއެވެ. އަށް ގައުމަކުން
ވާދަކުރާ މިމުބާރާތުގައި ފުރަތަމަ ބައްދަލުކުރާނީ، ސްރީލަންކާއާއި، ޕާކިސްތާނެވެ. ސްރީލަންކާއަކީ ކުރިން މި މުބާރާތް ކާމިޔާބުކޮށްފައިވާ ޤައުމަކަށްވާއިރު އަނެއްކޮޅުން ބައްދަލްކުރާ ޕާކިސްތާނަށް މިމުބާރާތުން ލިބިފައިވާ އެންމެ މަތީވަނަޔަކީ ތިންވަނައެވެ. މިމުބާރާތް ބޭއްވޭ ބަންގްބަންދު ސްޓޭޑިއަމްގައި މިހާރު ފަހުގެ ތައްޔާރީތަށްކުރިއަށް އެބަދެއެވެ.
މި މުބާރާތުގައި ރާއްޖެ ބައްދަލްކުރާ ފުރަތަމަ މެޗް ކުޅުމަށް ހަމަޖެހިފައިވަނީ މާދަމާއެވެ. ގްރޫޕް އޭގެ ފުރަތަމަ މެޗުގައި ރާއްޖެ ނުކުންނާނީ ނޭޕާލްއާ ދެކޮޅަށެވެ. މި މުބާރާތުގެ އެންމެފަހުގެ ޗެމްޕިއަނުން، ރާއްޖެ މިފަހަރު ތަށި ދިފާއުކުރަން ނިކުންނައިރު ޓީމުގެ ހުރިހާ މުހިންމު ކުޅުންތެރިންވެސް ފިޓްކަމަށް ޓީމުން ވަނީ ބުނެފައެވެ. އެގޮތުން ދުވަސްތަކެއްވަންދެން އަނިޔާގައި ހުރި ރާއްޖޭގެ ޓީމްގެ އެންމެ އިތުބާރު ފޯވަޑް އަދި ކެޕްޓަން އަލީ އަޝްފާގްވެސް ވަނީ އެންމެ ފަހުން ޕްރެކްޓިސް މެޗްތަކުގައި މެލޭޝިޔާގައި ކުޅުނު ދެ މެޗުގައިޗވެސް ރާއްޖެ މޮޅުކޮއްދިނުމުގައި އެންމެ މުހިން ދައުރެއް އަދާކޮއްފައެވެ. އެގޮތުން މެލޭޝިޔާގެ ތޭވީސް އަހަރުން ދަށުގެ ޤައުމީ ޓީމާއެކު ކުޅެ ހަތަރެއް އެކަކުން މޮޅުވި މެޗުގައި އަޝްފާގް ވަނީ ހެޓްރިކެއް ވެސް ހަދާދީފައެވެ. އަދި އޭގެ ކުރިން މެލޭޝިޔާގެ ސީނިޔާ ޓީމާއެކު ކުޅުނު މެޗުގައި ޖެހި ހަމަ އެކަނި ގޯލް ޕެނަލްޓިއަކުން ޖަހާފައިވަނީވެސް އަޝްފާގްއެވެ. އަނެއްކޮޅުން އަނިޔާއާ ގުޅިގެން މިއަހަރުގެ ބޮޑުބަޔެއް ކުޅުމާއި ދުރުގައި ހުންނަން ޖެހުނު ޤައުމީ ޓީމުގެ ގޯލް ކީޕަރު އަދި ވައިސް ކެޕްޓަން އިމްރާންވެސް ވަނީ ޓީމްގައި ފުލްކޮށް ކުޅެން ފައްޓާފައެވެ. ރާއްޖެ މާދަން ބައްދަލްކުރަންޖެހޭ ނޭޕާލް ވަނީ މި މުބާރާތަށް ބަންގްލަދޭޝްއަށް އައުމުގެ ކުރިން އިންޑިޔާގެ ކްލަބެއް ކަމަށްވާ މޯހުން ބަގާންއެކު ކުޅުނު މެޗް ފަހަތުން އަރާ ތިނެއް އެކަކުން ކާމިޔާބުކޮއްފައެވެ. އަދި އޭގެ ފަހުން ބޫޓާންއާ އެކު އިންޑިޔާގައި ބައްދަލްކުރިމެޗްވެސް އެ ޓީމުން ވަނީ ދޭއް އެކަކުން ކާމިޔާބުކޮއްފައެވެ. މި މުބާރާތުގައި ރާއްޖެ ހިމެނޭ ގްރޫޕުގައި ނޭޕާލްގެ އިތުރު ދެން ހިމެނޭ ޓީމްތަކަކީ މުބާރާތުގެ އެންމެ ވަރުގަދަ އެއްޓީމުކަމަށްވާ އިންޑިޔާ ގެ އިތުރުން އަފްގާނިސްތާނެވެ. ގްރޫޕް ބީގައި ހިމެނެނީ ބޫޓާންއާ ބަންގްލަދޭޝްގެ އިތުރުން ޕާކިސްތާން އަދި ސްރީލަންކާއެވެ.